Д. Даваагийн бүтээл АПБ Сан болон Сингапурын Урлагийн Музей /СУМ/ хамтран зохион байгуулж буй энэхүү нэр хүндтэй шагналын дараагийн шатанд өрсөлдөх болсоноорс тэрээр цаашид шагналд өрсөлдөх 10 шилдэг уран бүтээлчийн нэгээр шалгарч байгаа юм.

Уран бүтээлийн тухай

Дорждэрэмийн Даваагийн Орчлонд түгэх дуу хоолой хэмээх гурван хэмжээст бүтээл нь техникийн хувьд холимог буюу яс, арьс, мод, цаас зэрэг материал ашиглан туурвисан бүтээл юм. Энэ бүтээлээр үр хөврөлийн эхийн хэвлийд бий болсон цагаасаа эхлээд төрөх хүртэлх хугацааны амьдралыг дүрсэлсэн бөгөөд уран бүтээлч энэ бүтээлдээ эхийн хэвлий дэх хугацаа буюу төрөхөөс өмнөх амьдрал нь хүн төрөлхтөнд тохиож болох хамгийн эрх чөлөөтэй, цэвэр тунгалаг байдал юм гэх дотоод сэтгэл, итгэл үнэмшилээ шингээж харуулсан байна. Уг бүтээл нь Монголын Урлагийн Зөвлөл, Бэркелегийн Калифорнийн Их сургуулийн урлаг судлаач, мэргэжилтэн Чүлтэмийн Уранчимэг санал болгож, нэр дэвшүүлснээр гарч ирсэн юм.

Шагналд өрсөлдсөн 12 орны нийт 34 уран бүтээлчдийн бүтээлүүдээс олон улсын шүүгчдийн бүрэлдэхүүн шүүн хэлэлцэж, дараагийн шатанд өрсөлдөх 10 бүтээлийг тодруулсан байна. Тэрхүү 10 бүтээл нь Камбожи, Хятад, Энэтхэг, Малайз, Монгол, Сингапур, Шри Ланка, Тайланд, Вьетнам зэрэг улсаас шалгарчээ.

Олон улсын хүндэт шүүгчдийн бүрэлдэхүүнд Сингапурын нэр хүндтэй уран бүтээлчдийн нэг, Хятадын орчин үеийн урлагт шинэлэг өнгө аясыг санаачлагч Генри Чен Кезан, АПБ Сангийн Захирлуудын зөвлөлийн хурлын дарга Саймон Израел, СУМ-н захирал Квок Киан Чоу, Тайланд улсын Соёлын яамны орчин үеийн урлаг, соёлын газрын ерөнхий захирал Доктор Апинан Пошяананда, БНХАУ-ын Хятадын Урлагын Академийн ерөнхийлөгч, профессор Шу Жанг багтсан болно.

Шүүгчид шалгарсан 10 уран бүтээлчийн бүтээлүүдийн илэрхийлж буй санаа, уран сэтгэмж хийгээд сонгосон техник, материалаа хэрхэн зөв оновчтой ашиглан санаагаа илэрхийлсэн зэргийг ихэд сайшаалаа гэж Доктор Апинан Пошяананда онцлон хэлсэн юм.

Түүгээр ч барахгүй нийт оролцогчдын бүтээсэн бүтээлүүдийн ур хийц өндөр түвшинд байгаад бид маш сэтгэл хангалуун байна, энэ бүгдээс бид орчин үеийн урлаг Ази Номхон далайн бүсэд ямархуу түвшинд явааг бид тодорхой харж болно гэж тэрээр уралдаанд оролцсон нийт 34 бүтээлийн талаар нэмж хэлсэн юм.

Ирэх 10 дугаар сард дараагийн шатанд шалгарсан 10 бүтээлээс 5 нь шагнал хүртэх юм байна. Үүнд шүүгчдийн нэрэмжит шагнал 3, тус бүр 10,000 сингапур доллар, үзэгчдийн таашаал хүртсэн бүтээл 1, 10,000 сингапур доллар бөгөөд уралдааны тэргүүн шагнал буюу Гран При хүртэх бүтээл 45,000 сингапур долларын шагналтай юм.

Камбожи, Хятад, Энэтхэг, Лаос, Малайз, Монгол, Шинэ Зинланд, Папуа Шинэ Гвиней, Сингапур, Шри Ланка, Тайланд, Вьетнам гэсэн 12 орны 34 бүтээлээс тэрхүү 10 бүтээл нь шалгарсан юм. Нэр дэвшсэн бүтээлүүдийн хөндсөн сэдэв, ашигласан материал техник зэргийг нь харгалзахын хамт тухайн орны орчин үеийн дүрслэх урлагын хөгжлийн талаар өргөн мэдлэг, туршлага бүхий урлаг судлаачдын нэр дэвшүүлсэн, сүүлийн 3 жилийн туршид өөрийн орны орчин үеийн урлагийн хөгжилд үнэтэй хувь нэмэр оруулсан гэж үзсэн бүтээлүүдийг энд оруулсан байна.

Үзэгчдийн таашаал хүртсэн бүтээлд олгох шагналын гол онцлог нь шүүгчдийн бус ард түмний үнэлэмжээр тодруулах юм. Энэ шагналыг хүртэх бүтээлийг тодруулахаар 8 дугаар сарын 1-ны өдрөөс эхлэн бүтээлүүдийг вэб сайтад байрлуулан, интернетээр санал асуулга явуулах бөгөөд хамгийн олон үзэгчдийн саналыг авсан бүтээлд олгох юм. Энэ онлайн санал асуулга нь үзэгчид өөрсдийн таашаалд нийцсэн бүтээлд саналаа өгөх, дуу хоолойгоо хүргэх индэр болно. Онлайн санал асуулга 10 дугаар сарын 12-ны өдрийн 19.00 цагт хаагдах тул үзэгчид, өөрийн орны уран бүтээлийг дэмжих ард иргэд таашаалд нийцсэн бүтээлдээ http//www.nhb.goү.sg/sam/signatureartprize/үote.html гэсэн вэб хаягаар орж саналаа өгөх боломжтой.

Түүнчлэн, Сингапурын Урлагын Музейд 10 дугаар сарын 10-наас 12-ны өдрийг дуустал 3 өдрийн туршид сүүлчийн шатанд шалгарсан бүтээлүүдийг дэлгэн үзүүлэх бөгөөд энд үзэгчид өөрийн таашаасан бүтээлд биечлэн саналаа өгөх боломжтой. Биечлэн болон онлайн хэлбэрээр санал өгөгсдийн дунд азтан шалгаруулах бөгөөд шагналд нь Canon зургийн аппарат бэлэглэх ажээ.

АПБ Сангийн нэрэмжит урлагийн дээд шагналыг 3 жил тутамд нэг удаа орчин үеийн урлагийн хөгжилд үнэтэй хувь нэмэр оруулсан бүтээлүүдэд олгох юм. Уламжлал болгон зохиогдох энэхүү шагналын ажиллагаа нь 2007 оны 10 дугаар сард тохиосон СУМ болоод АПБ Сангийн хамтын ажиллагааны 15 жилийн ойг угтан зарлагдсан бөгөөд Ази Номхон далайн бүсэд орчийн үеийн урлагийг хөгжүүлэхэд хувь нэмэр оруулах зорилготой юм. Энэхүү шагналтай холбогдох бүхий л зардлыг АПБ Сан 2.25 сая сингапур доллароор санхүүжүүлэн, хэрэгжүүлж байгаа юм.