Энэ асуултыг би дандаа л боддог юм. Ялангуяа яарч тэвдсэн үедээ бүр ч илүү бодно. Ганцхан би ч биш хүн бүр л ийн боддог байх. Толгойтой болгон нь машин хөлөглөөд байгааг харахлаар Монгол улс хөгжөөд бас хөлжөөд байгаа юм шиг. Харин замаа харахаар өнөөх хөгжил гэдэг нь хаачив гэмээр. Уг нь жил бүр авто замын засвар, шинэчлэл хэмээх их ажил өрнөж, олон тэрбум төгрөгийн хөрөнгө зарсан ажил хийгдлээ гэсэн мэдээ тайлан гардаг. Хэдийгээр их хэмжээний хөрөнгө мөнгө зарж хийдэг ч энэ нь үр дүнгээ харуулахгүй юм. Зүгээр л нэг нь хийж, нөгөө нь хийлгэсэн нэр зүүгээд өнгөрдөг бололтой. Өнөөдөр нийслэлийн хэмжээнд чанарын шаардлага хангасан, бүрэн бүтэн зам хэд байгаа бол. Ингэж тоолвол цөөн тоо гарах байх. Хаашаа ч явсан эвдрэл, түгжрэлтэй зам. Үүнийгээ дагаад бухимдалтай жолооч, бухимдалтай зорчигчид. Бид ч яахав иймэрхүү байдлаар бухимдаж асуудал-тайгаа эвлэрчихнэ. Харин гадаадын зочид төлөөлөгчид эвлэрэх болов уу? Аялал жуулчлалыг өргөжүүлнэ, жуулчдыг татах их зүйл бүтээн байгуулна гэсэн хэрнээ нөгөөх жуулчидаа хөтлөх замдаа анхаарах нь дутагдаад байна уу даа гэсэн бодол төрөх юм. Энд нэг хөгтэй зүйл сонирхуулъя. Одоогоос хоёр жилийн өмнө Монгол орныг үзэж, манай орны байгалийн сайхнаар аялахаар, их хотыг маань зорьж Японы нэгэн гэр бүл ирж л дээ. Тэднийг эх оронтойгоо танилцуулж, үүх түүхээрээ бахархан явсан хөтөч залуу хоёр хүүхдээс нь Монголын юу нь гоё байна гэж асууж. Тэгсэн нөгөөх хоёр нь Зам нь ёстой гоё юм байна, машинаар явахад нойр хүргэхгүй. Манай Токиогийн зам машинаар явахад нойр хүргээд байдаг юм гэж хариулсан аж. Тэгэхээр нийслэлийн зам ямаршуухан хэмжээнд байдаг нь тодхон харагдаж байгаа биз. Хаашаа ч явсан, хаана ч очоод харсан ч захын зам Там болчихож. Тэгэхээр энэхүү Там-ын асуудалд эрчимтэй анхаарах цаг нь болжээ.

Ингээд энэ жил нийслэлийн хэмжээнд хийгдэж буй зам засварын ажлын явц ямар байгааг нийслэлийн Авто замын газрын орлогч дарга Л.Батцоожтой уулзаж тодрууллаа.

-Өнөөдрийн байдлаар зам засварын ажлын явц ямар байна вэ?

-Энэ онд орон сууцны хороолол дундах зам засварт 727.6 сая төгрөг, төв замын засварт нэг тэрбум төгрөг төсөвлөгдсөн. Ерөнхийдөө хийхээр төлөвлөсөн ажлаа хийж дуусах шатандаа явж байна. Ажлын биелэлт 90 гаруй хувьтай гэхэд болно. Одоогоор Сүхбаатар дүүргийн Их тойруу, Баянзүрх дүүргийн зарим зам засварын ажил л дуусаагүй байгаа. Зам засварын ажлын хажуугаар авто замын хэвтээ тэмдэглэгээ буюу цагаан шугамыг тавьж байна. Энэ ажлын тухайд 50 хувийн биелэлттэй. Мөн энэ жил 550 ширхэг замын тэмдэг, заалт хийж байрлуулсан.

-Зам засварын ажил хийгдэж дуусч байгаа ч чанарын баталгаатай эсэх нь тодорхойгүй. Сүүлийн үед шинээр хийгдэж байгаа зам богино хугацаанд эвдрэх болсон шүү дээ. Энэ тал дээр танай газраас хэр анхаарч байгаа вэ? Ер нь замын эвдрэлийг бий болгодог зүйл юу вэ?

-Ажлын гүйцэтгэлд тодорхой хэмжээгээр хяналт, шаардлага тавьдаг. Засварын ажлыг гүйцэтгэх гүйцэтгэгчийг шалгаруулах тендерт ч ямар хариуцлага байх талаар тодорхой тусгагдсан байдаг. Ерөнхийдөө зам засварын ажлыг нэг жилийн баталгаат хугацаатайгаар хийдэг байсан. Одоо үүнийгээ болиод гурван жилийн баталгаат хугацаа гаргуулдаг болно. Тэгэхээр зам засварын ажлын гүйцэтгэл тодорхой хэмжээгээр чанаржина гэж бодож байна. Замыг хамгийн их эвдэлдэг зүйл бол хөрсний ус. Хөрсний усыг зайлуулах шугам сүлжээгүй хийгдсэн зам маш амархан эвдэрдэг.

Д.Орхон

Дугаар 154/9710/