-Гудамж талбайд золгүй тохиолдлоор болон бусдын гарт амиа алдсан цогцсын хэн болох нь танигдахгүй эсвэл ар гэрийнхэн нь олдохгүй байгаа тохиолдолд танай төвд авчирдаг. Эдгээр цогцсыг яадаг талаар тодруулахгүй юу?

-Нийслэлийн хэмжээнд нас барсан, нэр хаяг нь тодорхойгүй, хэн болох нь тогтоогдоогүй, тогтоогдсон ч ар гэрийнхэн нь тодорхойгүй нас барагсад манай төвд ирдэг. Тэднийг цагдаагийн байгууллагатай хамтран хэн болохыг нь таниулах, ар гэрийнхэнд нь хүлээлгэн өгөх, нас барсан шалтгааныг нь олох зэрэг ажлыг гүйцэтгэдэг. Эдгээр цогцос дотор эзэнгүй нэлээд гардаг. Энэ тохиолдолд Нийслэлийн засаг даргын 1996 оны захирамжийн дагуу 30 хүртлэх хоногоор байгууллагын моргт хадгалдаг. Ингээд нэгдсэн журмаар төвийн ажилтан албан хаагчид хөдөөлүүлдэг.

-Хаана хөдөөлүүлдэг, зардал мөнгийг нь хаанаас гаргадаг талаар тодруулаач?

Дээр дурьдсан Нийслэлийн засаг даргын захирамжийн дагуу Нийслэлийн Засаг даргын тамгын газраас зардал нь гардаг. Цогцсыг Наран-гийн энгэрт хөдөөлүүлдэг.

-Та түрүүн хөдөөлүүлэх ажиллагааг манай төвийн ажилчид гүйцэтгэдэг гэсэн. Энэ ажилд оролцсон ажилчдад оногдох хөлс мөнгө гэж байдаг уу. Эсвэл зүгээр л албан хүчээр дайчилдаг юм уу?

-Бас л нөгөө засаг даргын захирамжинд заагаад өгчихсөн байдаг. Ажиллагаанд оролцсон нэг хүнд 3000 төгрөг өгнө гээд. Энэ бол хамгийн хэцүү, муухай ажил шүү дээ. Cap болсон цогцос гэдэг ямар л олиг байв гэж дээ. Тэгсэн атлаа хангамж нь ийм байдаг. Энэ үйл ажиллагаанд зарцуулагддаг хөлс мөнгө нь чамлалттай санагддаг. Сүүлийн үед явах хүн олдохгүй бараг л хүчээр шахуу явуулдагдаа.

-Ер нь хэн болох нь танигдахгүй, танигдлаа ч ар гэрийхэн нь аваагүй орхичихсон ийм цогцос хэр их ирдэг вэ?

-Өдрөөр нь гаргачихсан тийм нарийн тооцоо алга. Ер нь жилд 350-400 орчим эзэнгүй цогцсыг хөдөөлүүлдэг байсан. Энэ нь жилд 365 хоногтой гээд үзвэл ямар тоо гарах нь тодорхой шүү дээ. Энэ тоо сүүлийн үед харьцангуй буурч байгаа. Жишээлбэл 2007 онд 30-40 хувь, 2008 оны хагас жилийн байдлаар хоёр дахин буурсан дүн гарсан.

-Эзэнгүй цогцос гарлаа гэхэд цагдаагийн байгууллагынхан хэр оролцож, хамтран ажилладаг вэ?

-Нэгэнт эзэн холбогдогч нь тогтоогдоогүй, задлан шинжилгээгээр гадны нөлөөлөлгүй гэдэг нь тогтоогдоод ар гэрийнхэн нь ирж авахгүй байгаа тохиолдолд цагдаагийн байгууллагынхан яах ч арга байхгүй шүү дээ. Харин гадны нөлөөллийн улмаас амиа алдсан тохиолдолд энэ чинь гэмт хэрэг болох үүднээсээ цагдаагийнхны оролцоо их байдаг. Ийм цогцсууд нэг их уддаггүй. Ар гэрийхэн нь ирээд аваад явчихдаг.

-Тэгвэл ихэнхдээ гэр оронгүй, гудамжныхан ирдэг гэсэн үгүү?

-За бараг тэгж хэлж болно. Ер нь ирж байгаа цогцсын 70-80 хувь нь гудамжныхан байдаг. Бас дээр нь нэмж хэлэхэд улирлын чанартай шүү дээ. Өвөл нэмэгдэнэ, дулаараад ирэхээр багасна. Гэхдээ сүүлийн үед харьцангуй багассан.

Дугаар 149 /169/