Мөн нийслэлийн Эрүүл мэндийн газраас тамхигүй ресторан шалгаруулах цаашид тамхийг хязгаарлах уралдааныг зарлах талаар журам батлах тогтоол гаргах зэрэг хэд хэдэн асуудлыг авч хэлэлцэв. Нийслэлийн өмч болох Соёлын төв өргөөнд учирсан хохирлыг тогтоохоор Нийслэлийн өмчийн харилцааны газар ажиллажээ. Ажлын хэсгийг ахалсан Нийслэлийн өмчийн харилцааны газрын дарга М.Ганбаатар хохирлын хэмжээний талаар мэдээлэл хийхдээ, Соёлын төв өргөө цогцолбор их хэмжээгээр хохирол амссан. Ажлын хэсэг хохирлын хэмжээг тогтоогоод урьдчилсан дүнг гаргалаа.

СТӨ цогцолборт тэрбум 723 сая төгрөгийн хохирол учирсан гэсэн тооцоо гараад байгаа. Тус цогцолборын эвдэрч, хэмхэрсэн цонх, хаалга бүрээр нь нарийн тооцож гаргалаа. Байгууллагын хэмжээгээр 224 ширхэг цонх, шил хагарч, 118 хаалга хэмхэрсэн байна. Мөн 741 ам.метрийн шилэн хананы шил хагарсан, хамтлаг, уран бүтээлчдийн хөгжим, эд зүйлс гээд хулгайд алдагдаж маш их хохирол гарсан билээ. Тус байгууллагын Г корпус тэр чигээрээ цахилгаан, ус, холбоогүй байгаа. Уг нь СТӨ цогцолбор сард 32 сая төгрөгийн цэвэр орлого олж нийслэлийн төсөвт төвлөрүүлдэг байсан. Нийт 83 аж ахуйн нэгж өрөө түрээслэн үйл ажиллагаа явуулдаг байжээ.

Одоогоор түрээслэгч нэг ч байгууллага байхгүй бүгд нүүсэн байгаа. Харин цогцолборт үйл ажиллагаа явуулж байсан Уран зургийн галерейд 347 сая, Г корпуст тэрбум 375 сая төгрөгийн гэмтэл хохирол учирсан байна гэв. Хурлаар энэхүү хохирлын хэмжээтэй танилцаж хэлэлцээд тогтоол гаргах эсэхэд төлөөлөгчид санал бодлоо хуваалцсан юм. Анх хохирол учирсны дараахан хохиролыг нь төрөөс барагдуулна гэж байсан аж. Гэтэл Сангийн яам, БСШУЯаас хохирлыг барагдуулах хөрөнгө гаргаж өгөхгүй нийслэл өөрсдийнхөө төсвөөс гарга гэж хэлсэн гэнэ. Хурлын үеэр төлөөлөгчид олон талаас нь саналаа гаргаж байлаа.

Тухайлбал, удаан хугацаагаар түрээслэж буй аж ахуйн нэгжийг өөрсдийнх нь хөрөнгөөр засвар хийлгэж хөнгөлөлт үзүүлбэл ямар болох, Нийслэлийн өмчийн харилцааны газарт харьяалагдах байгууллага бүрийг даатгалд хамруулах талаар хэлэлцсэн юм. Ингээд эцэст нь энэхүү хохирлын хэмжээг нэн яаралтай тогтоол гаргах дээр санал нэгдэн НЗД-т өргөн барьж цааш нь Засгийн газарт хүргүүлэх, нийслэлийн өмчийн газар бүрийг даатгалд хамруулах талд санал нэгтэй дэмжсэн юм.

Ж.Батцэрэн

Дугаар 170 /2457/