Тэрбээр өөрийн энэхүү айлчлалаа дүгнэхдээ үүргээ биелүүлсэн гэж үзэж байгаа аж. Ингээд түүний ВВС агентлагт өгсөн ярилцлагыг тоймлон хүргэе.

-Юуны өмнө айлчлалаа амжилттай хийсэн танд баяр хүргэе. Айлчлалын тань гол зорилго?

-Улс орныхоо ирээдүй болон хөгжил, дэвшлийн төлөө ажиллаж байгаа хүний хувьд Америк оронтой нягт холбоо бүхий харилцаатай улс орнуудын байдалтай өөрийн биеэр танилцахыг зорьлоо. Төлөвлөсөн ёсоор тухайн орны бүх төрийн тэргүүн болон өндөр албан тушаал бүхий хүмүүс айлчлалын минь үеэр цаг зав гарган уулзаж, илэн далангүй яриа өрнүүлсэн нь сайшаалтай.

-Тегераны уран баяжуулах үйлдвэрлэлийг зогсоох тухай асуудлаар та маш хатуу байрь суурийг баримталж, нэлээд хурц мэдэгдлийг хийсэн?

-Тиймээ, Тегераныг уран баяжуулах ажиллагаагаа зогсоох хэрэгтэй гэх шаардлагыг дэлхий нийт хүчтэй тавихгүй байгаа мэт надад бодогдож байна. Тус улс энэ ажиллагааг энхийн төлөө гэж мэдэгдэж байгаа ч үнэн хэрэг дээрээ тийм биш гэдгийг бид баримттай нь нийтэд дэлгэсэн. Тагнуулын аргаар нотолгоо, баримтуудыг цуглуулсан ч энэ бүх зүйл зөвхөн Америкт бус дэлхий нийтийн амгалан байдлын төлөө гэдгийг ойлгох нь чухал. Тиймээс Иран Европын Холбооны саналыг хүлээн зөвшөөрөх хэрэгтэй.

-Терроризмын тухайд?

-Энэ аймшигт зүйлийг ор мөргүй устгахын төлөө бүхий л зүйлээ зориулна. Терроризмыг өөгшүүлэн дэмжигчтэй хатуу тооцоо бодох хэрэгтэй. Талибан, Аль Каида зэрэг терроризмын томоохон бүлгүүдтэй дэлхий нийтээрээ тэмцэхийг уриалж байна.

-Таны гол өрсөлдөгчийн нэг Жон Маккейн Их найм-ын бүрэлдэхүүнээс ОХУ-ыг хасах саналыг та няцааж байсан?

-Энэ санал түүний ялимгүй нэг алдаа байсан гэж хэлэх байна. Хамгийн чухал асуудлуудын нэг терроризмтой тэмцэхийн тулд тодорхой хэмжээгээр цэргийн баазаа хүчирхэгжүүлэх ёстой. Энэ бүгдийг Орос улсгүйгээр хийх гээд төсөөлөөд үз л дээ. Тус улс нь зэвсгийн хүчирхэг байдлаас гадна хүн төрөлхтөний хөгжилд шинжлэх ухааны томоохон нээлтүүдийг гарган хэрэгжүүлэх хүчирхэг улс гэж боддог.

–Удахгүй болох Ерөнхийлөгчийн сонгуулийн нэр дэвшигчээс та хамгийн өндөр рейтингтэй яваа. Ер нь өөртөө хэр итгэлтэй байна?

-Итгэлтэй байна гэдэг зөвхөн сонгуулийн өрсөлдөөн дээр илрэхгүй шүү дээ. /инээв/ Өөрийнхөө аливаа ажилд би үргэлж итгэлтэй байдаг.

-Та төрийн тэргүүнээр сонгогдсоноор улс орноо хэрхэн төсөөлж байна?

-Улс төрийн шинэ бодлого, тогтолцоотой шинэ үеийн Америк орныг төсөөлдөг.

-Ажиглаж байхад та аливаа асуултанд хурц, шулуун хариулах юм аа?

-Үнэнийг хэлэхэд улс төрч хүн хурц, шийдмэг үгтэй, дайчин зан чанартай байх хэрэгтэй гэж боддог.

-Ингэхэд та хэзээнээс улс төрч болъё гэж шийдсэн бэ?

-Колумбын Их сургуулийг дөнгөж төгсөөд ядуу, буурай амьдралтай хүмүүст тусалж дэмждэг сүмийн тусламжийн багт ажиллах болсон юм. Тэр л үед тэдгээр хүмүүсийн аж амьдралыг дээшлүүлэхийн тулд нэн түрүүнд хуулийн тогтолцоо өөрчлөх хэрэгтэй гэж бодсон. Ийнхүү улс төрч болох санаа анх төрсөн гэж болно.

-Америк хүний мөрөөдөл гэж таныхаар юуг хэлэх вэ?

-Өөрийн гэсэн гэр, оронтой тэндээ гэр бүлтэйгээ тайван амьдарч, үр хүүхэддээ боловсрол олгож чадах, эмнэлгийн тусламж авах гэж хэлнэ. Өнөөдөр Америкт 47 сая хүн эмнэлгийн үйлчилгээний төлбөрөө төлөх чадваргүй байна. Энэ бол эмгэнэл.

-Хүмүүсийн аж, амьдралыг дээшлүүлэхийн тулд цаг, завгүй ажиллаж байгаа та хэзээд нь гэр бүлдээ анхаарал тавьж байна даа?

-Улс төрч хүний хамгийн сайн түшиг, тулгуур нь гэр бүлийн хүн байдаг. Миний эхнэр бусад эмэгтэйчүүдийн адил үр хүүхдээ асран, хүмүүжүүлж, ар гэрээ, албаны ажлаа ч амжуулж яваа нэгэн. Амралт чөлөөт цагаа хүүхдүүдийнхээ хүмүүжилд зориулахыг хичээдэг. Манайх хоёр охинтой. Малия 10 настай, Саша долоон настай.

-Эцгээс минь өвлөсөн мөрөөдөл хэмээх таны бичсэн ном одоог хүртэл Европын бестселлер хэвээр байгаа. Энэ номыг бичих болсон тухайд?

-Би төрсөн эцэгтэйгээ тун ховор уулзаж байсан. Ажил, боловсролдоо дэндүү их дурласан хүн байсан бөгөөд тэр зорилгынхоо төлөө ээж бид хоёрыг орхиод явсанд нь гомдож, үзэн ядах өдрүүд олон байсан. Гэтэл намайг 21 настай байхад аав минь автын ослоор хорвоогоос халисан юм. Энэ л үед эцэгтэйгээ хамт байх юм сан гэсэн мөрөөдлөө мэдэрч номоо бичих санаагаа олсон.

Э.Оджаргал

Дугаар 154/9710/