БТСУХ-ны дарга Ч.Наранбаатар, дэд дарга Д.Сүрэнхорлоо, Монголын үндэсний олимпын хорооны ерөнхийлөгч Д.Загдсүрэн, дэд ерөнхийлөгч Ц.Дамдин нар болон тамирчид хүрэлцэн ирсэн юм. Тэд Бээжингийн олимпын нээлтэд оролцохдоо гангарах ёслолын хувцастайгаа иржээ.

Ерөнхий сайд Та нарын хувцас сайхан харагдаж байна. Бэлгэшээж бодмоор өнгөтэй юм. Олимпод оролцох тамирчдыг дэмжиж, хандив өргөж байсан хувь хүн, албан байгууллагад талархаж байна. 1964 оны Токиогийн олимпоос хойш Монгол Улсын тамирчид оролцож, одоо 11 дэх зуны наадамдаа явахаар бэлэн болжээ. Өмссөн хувцасныхаа өнгө шиг медальтай ирээрэй. Монгол Улсынхаа төрийн далбааг олимпын тэнгэрт мандуулах болтугай гэсэн юм.

Энэ үеэр тив дэлхийн тэмцээн, уралдаанд амжилттай оролцсон тамирчдыг 117.8 сая төгрөгөөр шагнахаар болсныг дуулгав. Мөн олимпод оролцохоор болсон тамирчдад 200 мянган төгрөг cap бүр олгож байхаар боллоо гэдгийг хэллээ.

Ингээд тамирчид, дасгалжуулагчдад тэрхүү мөнгөн тэтгэмжийг гардуулав. Үүний дараа гавьяат тамирчин Б.Наранбаатар Биднийг дэмжиж байгаа бүх хүнд талархаж байна. Удахгүй эхлэх олимпын наадамд амжилттай оролцож, төрийн дууллаа эгшиглүүлэх болно. Ялалт үргэлж бидэнтэй хамт байх болтугай гэсэн юм. Ингээд олимпод бэлтгэх үндэсний хорооны дарга С.Баяр тамирчдад спортын хувцас бэлэглэв. Урд хөрш рүү ирэх даваа гаригт хүлгийн жолоо залах гэж буй 29 тамирчин төрийн их есөн хөлт цагаан тугны өмнө зургаа татуулж, адис авч, хийморио сэргээсэн юм

дугаар 147/466/