Өчигдрийн байдлаар гал түймэр хэд хэдэн жижиг тосгоныг хамраад байгаа бөгөөд орон гэргүй бологсдын тоо нэмэгдсээр байна.

CNN-ийн Уиттлси хот дахь сурвалжлагч Жон Ваузын мэдээлснээр Агаарын температур маш сэрүүхэн байгаа ч салхины улмаас гал түймэр газар авсаар байгаа юм. Хамгийн сүүлийн мэдээгээр түймэрт 181 хүн амь насаа алдаад байна. Цагдаагийн дарга Кристин Никсон Илүү олон хүн ч амь үрэгдэх нь гээд Энэ үнэхээр том хэрэг. Түймэр гарч байгаа газрууд руу унтраах, аврах хүч илгээж байгаа ч бид цогцсуудыг олсоор л байна гэж хэвлэлийнхэнд ярив.

Харин орон гэргүй бологсдод тусалж байгаа сайн дурын ажилтан Аш Фелин 18 сарын дотор энэ хүмүүийн амьдрал хэвэндээ орно. Гэхдээ урьдынх шигээ байхгүй л байх гээд Энэ бидний үзсэн хамгийн аймшигтай, эмгэнэлтэй тохиол. Дахин харахгүй байх гэж найдаж байна гэжээ. Одоогоор 901.935 акр газар шатаж, дор хаяж мянга гаруй өрх орон гэргүй болоод байгаа юм.

Тус улсын ерөнхий сайд Кевин Рудд Хоёрдугаар сарын 7-ны өдөр манай улсын түүхэн дэх хамгийн хар өдрүүдийн нэг болох нь. Үхэл, оршуулгын өдөр гээд Франц, Япон, Шинэ Зеланд, Сингапур, Таиланд, АНУ зэрэг улсууд хандив тусламж үзүүлэх болсныг мэдээлсэн юм.

Ц.ЛХАГВАСҮРЭН

Дугаар 026/952/