Миний бие шүүнийг гайгүй танихын хувьд бас тийнхүү эргэлзэж гайхаж байсан юм. Тэгээд ч арга буюу түүний гэрт очиж эрхэм хүн гуай юухийгээд таг чиг болсоныг сонирхсон юм. Арай ч арван жил унтаагүй юм байна. Нэг юм хийгээд суугаа юм байна. Би нэлээд ятгасаны эцэст зарим бүтээлээсээ Хөх толбо сонинд нийтлүүлэхийг зөвшөөрүүлж чадлаа. Ингээд та бүхэн Т. Мандирын бичээд дуусч буй Дэлхийн нүүдэлчдийн өвөг түүх, их хаадын угсаа залгамж, цолгорсон хаадын хөрөг таталбар хийгээд намтрын цувисан ХАШ ЭРХИ оршвой хэмээх номыг цувруулан нийтлэх боллоо. Эрхэм уншигч абугай болгоон тольдох ажаамуу.

Оршил үлгэр буюу хүмүүн гэгчийн тухай Эртний Дорнын материалистууд /будда, нагаржуна/ хүн хаанаас буюу эсвэл хэрхэн үүсэв гэдэг асуудлыг онцлон сөхөж байгаагүй нь сонин. Харин тэдний дараа үеийн гүн ухаантнууд тухайлан энэ асуултыг сонирхож нэлээд цогц тайлбаруудыг гаргасан байна. үүнийг уншигч абугай таны гэгээн мэлмийд товчлон өргөвөөс ийн буюу. Тоолшгүй цагийн тэрдээд энэ дэлхий усан мандлаас шороон мандал бүрэлдэж, элдэв ургамал дэлгэрэх үес огторгуйд гэрлээс үүдсэн нэгэн амьтан /амьтан гэдэг бас болхидуу үг болов / оршиж байжээ. Тэр нь хожмын хүмүүний өвөг дээдэс байжээ. Анх тэдний нас нэгтэрбум орчим жилээр тоологдож байж. Тэд хурьцлаар бус гэрлээр нөхцөн үржиж байсан гэх. Мән гэрлээс эрчим хүчээ авахаас бус органик бодисыг үл хэрэглэнэ. Тийнхүү орчсоор үйлт нэгэн болохуй дор тэдний нэг нь дэлхийд аху ургамал, үр жимсний өнгө, үнэрт тачааж, тэсгэлгүй газарт буугаад үр сэлтийг амталсанаар өнгө нь буурах төдий бус нисэх чавдар нь алдагджээ бас бус тэвчээргүй нь үйлийг дагасаар мөнөөх нь тэнгэрийн амьтад цөм дэлхийн үр, жимсний амтанд автагдаж цөм гразар бууж, үр жимс идэгч буюу органик тэжээлтэн болсоноор хүмүүн үүссэн гэж тайлбарлана.

Хүн бичнээс үүсээгүй гэж энд тов тодорхой хэлсэнийг та бүхэн ойлгосон буй заа. Эрчим хүчнийхээ эх үүсвэрийг тэд ийнхүү өөрчилсөнөөр эр эм бэлгэс бүрэлдэж тийнхүү наслах тоо нь ч 1000 хүртэл хорогдсон ажгуу. Гэвч тэд бас ч тэнгэрлиг чанараа хадгалсаар байв. Гэтэл нэг хүмүүн маргааш идсүгэй хэмээн нэг сайхан жимсийг хойш тавьж хоносноос хойш өмч хураах сэтгэл үүсч хүмүүн улам бохирдсон гэх. Өмчийг өөртөө хадгалдаг байснаа эхнэртээ, үр хүүхэддээ гэсээр үүнээс ураг, удам хэмээх бүлэглэл үүсч, өнөөгийн үйлт төр засаг гэгчийг үүсгэх болсоноор буян нь улам хомсдон, насны хэмжил 100 төдий болов. Би маш товч тайлбарлаж байгаа мэдээж шашны агуулгатай зүйлийг нь бүр орхичихлоо. Өнөөгийн эринд Дарвины эволюцийн онол ойшоогдохоо больж, зөөгдмөл оюун ухаан -ы тухай элдэв санал хүмүүст тийм ч гаж санагдахаа больсон учраас Дорнын язгуур гүн ухааны нэлээд буйртай энэ цогц онолыг номынхоо оршилд оруулах нь зүйтэй гэж санагдсан юм. Хэрэв та дэлгэрүүлэн сонирхоё гэвэл Саган сэцний Эрдэнийн товч, Галдан туслагчийн Эрдэнийн эрхи хэмээх хоёр судрын оршлийг үзчих. Товч бөгөөд тодорхой бий. Жаахан лавшруулъя гэвээс Энэтхэгийн Вед, Зараостр, Күнз, Мэнзийн зарим ойлгомжтой сургаа, үлгэр домогуудыг харшуулан судалж болох юм. Гэхдээ энэ нь ч будилахын нэмэр байх даа.

Дагавар оршил буюу АРИ НАРЫН тухай ДОМОГ БА ҮНЭН

Тэнгэрлиг язгуураас газрын хүмүүн болж доройтсон тэдгээр үйлт амьтад анх аль газрын жимсийг амталж, чухам хаана газардсан нь тодорхой бус байдаг. Замбутив хэмээх нэгэн цэг байдаг боловч энэ нь нягтлахад тун хэцүү, дэндүү түгээмэл ухагдахуун бөгөөд бараг газар зүйн ойлголтоос давж гарчихдаг юм. Тэгэхээр үүнийг түр орхиж, ари нар хэмээх арай илүү түүхэн томъёолоыг хөндсүгэй. Санскрит буюу самгарид хэлний арья хэмээх үгнээс түүх бичлэгт ари хэмээн хэвшсэн үг нь ариун цэвэр орчин үеийн бүдүүлгээр томъёолбол оригинал гэсэн утгатай ажээ. Энэ ариун угсаатан анх Төв Ази, чухамдаа Монголын говь талаас халин гарч, түм гаруй. жилийн тэртээ Шар, Хөх мөрний дунд, адаг урсгалыг нээн цэцэглүүлээд улмаар 8000 жилийн тэртээ одоогийн Ираны тэгш өндөрлөгийг эзэгнэж, Тигр, Евфрат мөрөнд Шумер-Вавилоны соёлыг үндэслэжээ. Ари нарын нэг салбар нь Инд, Ганг мөрнийг дагаж, Виндхукийн уулсаар замнаж, Деканы хойг дахь уугал Дравид нарыг эзэгнэн, Аръявартча хэмээх нэгэн гайхамшигт соёлыг цогцлоосон ажгуу. Өрнөд Ази буюу Персийн тэгш өндөрлөгийг тэр цагт Ариана гэж байсан нь Ари нарын нутаг гэсэн л үг чухам тэдний үр сад нь ассир, перс хэмээн хаант төрийн цогцлоод удам нэгт шумер, вавилоноо дарангуйлсан нь дараа үеийн хэрэг юм.

Ариун угсаатны давалгаа 6 дахь мянган жилдээ ч зогссонгүй, тэдний нэг салаа Гиксос хэмээх мисир нэртэйгэр цагаан, цэнхэр нилийн садаргаар түрэн орж, тэр үед мухардалд ороод байсан Мисир/Египет/ -ийн Фараонуудыг эрхшээлдээ оруулаад, 150 гаруй жил эзэгнэхдээ цоо шинэ иргэншлийг үүсгэсэн байдаг. Гиксосыг Монгол домог, сурвалжид ямаа хаадын улс гэж тэмдэглэсэн нь лавшруулан судлууштай сонин жишим мән. Ари нар явсаар л байжээ. Хожим нэгэн цагт /6000 шахам жилийн дараа шүү/ Өмнөд Америкийн соёлт инкүүд Номхон далайруу зорин одсон шиг ари нар өрнө зүг тууштай ахисаар Балканы хойгт түр амсхийхдээ Бага Азид Хетт, Пелопоннест шинэ Эллин, Крит аралд Микений соёлын үрийг тарьжээ. Крит-Микен, ялангуяа Эллин соёл нь ари буюу язгуур нүүдэлчдийн соёлын шинэ давалгааг төрүүлсэн юм. Ари нарын әрчим хүчнии хүч шавхагдаагүй л байв. Тэдний сүүлчийн үр сад Апенинний хойгт очин, Лациум, Кампани орчмоор Тибр мөрнөөр түрэн орохдоо нутгийн лат, этруссийг ноёрхож, улмаар ромын гэх соёл иргэншлийг гардан бүтээсэн байна. Ари нар Италийн нутагт юлус гэдэг нэр авсан нь хожмоо Патриций нарын шүтээн нэрийтгэл болжээ. /Юлий/ Монгол домог сурвалжид Ромыг Юлус гэж бичдэг.

Ийнхүү ари нарын эрчим хүч тухайн үеийн хүн төрөлхтний амин гол соёлын голомтуудад шингэн харилцан шүтэлцсэнээр цоо шинэ өнгө төрх, үр дагавар бүхий иргэншлүүдийг бүрдүүлжээ. Хожмын Ромын Имперүүдийн байлдан дагууллын үр дагавараар Германы дайнч омгуудын зарим зонхилоочид, Ромын патрицуудтай ураг барилдсанаас ари язгуурын шинэ давхарга 2000 орчим жилийн тэртээ Альбус /Эльба/ Райус / Рейн/ мернйщий сав орчмоор бүрэлдсэн буй. Энэ нь хожмын Немцийн ари ястаны өвгө байж мэднэ. Энэ бүхнийг лавшруулан сонирхох оюутнууд Рене Груссе Азийн нүүдэлчдийн түүх, Ж.Неру Ертөнцийн түүхийг сөхөн үзвэл 1 боть, Д.Майдар, Лха. Дарьсүрэн нарын Монгол гэр, Сымацяны Шизци Тогтох Эсгий туургатны түүх 1 боть, Чандмань, Тэнгис нарын Монгол хэлтнүүдийн 8000 жилийн түүхийн мөрдөлт тэргүүн дэвтэр зэрэг болон холбогдох зарим сэдэв, өгүүллүүдийг шүүрдэн үзэж болно. Танд ч ба шинэ санаа төрөх нь дамжиггүй.

Б.Эрдэнэбаатар

ХӨХ ТОЛБО сонин

Дугаар 04 /668/