Жимс, хүнсний ногоо их хэрэглэдэг айлын хүүхэд энэ төрлийн хоол тэжээлд илүү дуртай байхад, эцэг эх нь түргэн хоол идэж, хийжүүлсэн ундаа уудаг бол хүүхэд адил сонирхолтой байдаг гэнэ. Калифорнид өдөрт өсвөр насныхны хоёр сая гаруй/62 хувь/ нь хийжүүлсэн ундаа ууж, сая 400 мянга/43 хувь/ нь түргэн хоол иддэг байхад дөнгөж 38 хувь нь жимс, хүнсний ногоо хэрэглэдэг нь тогтоогджээ. Хүүхэд залуусын эрүүл хүнсний хэрэглээ багасч буй шалтгаан нь газар сайгүй байрлах түргэн хоолны газруудтай холбоотой аж. Зөв хооллолтын хэвшлийг гэрээсээ эхлүүлэх хэрэгтэй гэж судлаачид зөвлөж байна. Калифорнийн өсвөр үеийнхний гуравны нэг нь илүүдэл жинтэй байгаагийн гол шалтгаан гадуур хооллолт гэнэ. Томоохон эрүүл мэндийн байгууллагын судалгаанд хэдэн мянган хүүхэд, залуус хамрагдаж дараахь дүгнэлтэд хүрчээ.

-Өдөр бүр хийжүүлсэн ундаа хэрэглэдэг айлын хүүхэд хэрэглэдэггүй айлын хүүхдээс энэ терлийн ундаа уух магадлалаар 40 хувь илүү байдаг.

– Жимс, хүнсний ногоо тогтмол хэрэглэдэг айлын хүүхэд хааяа хэрэглэдэг айлын хүүх¬дээс эрүүл хүнсний хэрэглээгээрээ 16 хувь илүү байдаг.

– Өсвөр насныхны эцэг эхчүүдийн тэн хагас нь өдөр бүр түргэн хоол идэж, хийжүүлсэн ундаа уудаг байхад 39-хөн хувь нь эдгээр зүйлсийг хэрэглэдэггүй байна.

– Эцэг эхчүүдийн 45 хувь нь жимс, хүнсний ногоо тогтмол хэрэглэдэггүй бол 39 хувь нь хэрэглэдэг аж.

Залуу үеийнхний илүүдэл жингийн асуудлыг шийдэхийн тулд эцэг эхээс нь эхлэх хэрэгтэй, тэд хүүхэддээ бүх талаар нөлөөлдөг. Хүүхэд эерэг сөрөг зуршилтай болох, эрүүл мэнд нь ямар байх тэднээс л хамаарна. Ялангуяа эрүүл хүнс хангамжийн асуудалд дорвитой анхаарах хэрэгтэйг судалгааны үр дүн харуулжээ.

М.Даваасүрэн

Дугаар 028