Чайналко Рио тинто-гийн 7,2 тэрбум ам.долларын хөрвөх бондын төслөөр хэрэгжих Чили, Австрали, АНУ дахь ашигт малтмалын ордыг авахаар төлөвлөжээ. Хөнгөн цагаан, зэс, төмрийн хүдрийн хамтарсан компаниудыг байгуулах стратегийн түншлэлийг тэд ийнхүү байгуулав. Чайналко Рио Тинто-гийн Австрали дахь Квинслэндийн Вейпагийн бокситын уурхайн 30, Чили дэх Атакамын цөлд байдаг, ВНР Биллитон-ы ажиллуулдаг зэсийн уурхайн 49, АНУ-ын Юта мужийн Кеннекот Юта Коппер компанийн 25 хувийг тус тус авахаар болж байгаа юм. Гэрээтэй холбогдуулан энэхүү хамтарсан бизнесийн бүх үйл ажиллагааг Рио Тинто хянаж удирдах аж. Манай улсын Оюутолгойн ордыг олборлох Айвенхоу Майнз компанийн 9,9 хувийг Рио тинто групп эзэмшдэг. Тэдний өр 39 тэрбум ногоон-д тулаад байгаа. Шинжээчид энэхүү гэрээг нүдээ олсон, компанийн ирээдүйд үр өгөөжөө өгнө гэж үзэж байгаа юм. Оюутолгойн ордыг ашиглах Айвенхоу Майнз, Рио тинто компанийн ажлын хэсгийнхэнтэй Засгийн газар хөрөнгө оруулалтын хэлэлцээгээ үргэлжлүүлсээр байгаа билээ.

Ж.Цогзолмаа

Дугаар 35/3107/