Зах зээлийн шалгарлаар олон сургууль дампуурч, бас нэгдэж нийлсэн. Нийт их дээд сургуулийн 134 нь Улаанбаатарт, 28 нь орон нутагт оршдог. Намар хичээл эхлэнгүүт хэд, хэдэн сургууль хаалга барих нь гэсэн мэдээлэл тараад байсан. Шаардлага хангахгүй их, дээд сургуулиудын тоог цөөлнө гэдгээ БСШУ-ы сайд Ё.Отгонбаяр мэдэгдсэн. Харин энэ ажил хэрэгжиж эхлэв бололтой. Цөөн оюутантай, өөрийн хичээлийн байргүй сургуулиуд хоорондоо нэгдэж эхэлжээ. Хамгийн түрүүнд Орхон их сургуульд Хасагт хайрхан, Шинэ эрин коллежтой нэгдэн үйл ажиллагаагаа явуулж эхэлсэн байна. Орхон их сургууль 1800 орчим оюутантай, хэл шинжлэлийн сургууль, аялал жуулчлал, эдийн засаг, хууль зүй, нарийн бичгийн дарга, гадаад хэлний багш, орчуулагч гэсэн мэргэжлийн ангиудтай. Өөрийн хичээлийн байр, 120 оюутны дотуур байртай. Хасагт хайрхан коллежийн хувьд нийгмийн ухаан, эрх зүй, багш мэргэжлээр багш бэлтгэдэг байсан юм. 58 оюутантай, өөрийн гэсэн хичээлийн байргүй. Шинэ эрин коллеж монгол хэл, гадаад хэл, аялал жуулчлал, бичиг хэргийн менежмент гэсэн мэргэжлийн ангиудтай. 29 оюутантай өөрийн гэсэн хичээлийн байртай байжээ. Дээрх коллежиуд Орхон их сургуулийн хичээлийн байранд нэгдэж хичээллэж байгаа аж. Оюутнуудыг мэргэжлийн дагуу элсүүлж, багш нарыг нь ажиллуулж байгаа юм байна. Мөн өөр мэргэжилтэн бэлтгэж байгаа бол багшлах боловсон хүчинг шийдэж өгөхөөр болжээ. Мөн Худалдаа үйлдвэрлэлийн дээд сургуулийн Баянхонгор аймаг дахь салбар, Хонгор коллежийг мөн нэгтгэх болсон байна.

Дугаар 032/611/