Монгол Улс НҮБ-д элссэний 50 жилийн ойг тэмдэглэх хүрээнд ОХУ-аас НҮБ-д суугаа Байнгын төлөөлөгч, Элчин сайд В.Чуркин ГХЯ-ны Төрийн нарийн бичгийн дарга Д.Цогтбаатарын урилгаар энэ 7 дугаар сарын 22-27-нд Монгол Улсад зочилж байна.

Тэрээр ГХЯ-ын Төрийн нарийн бичгийн даргатай уулзалт хийж, Монгол-ОХУ-ын харилцаа хамтын ажиллагаа болон олон улсын хамтын нийгэмлэгийн хүрээнд өрнүүлж буй хоёр орны хамтын ажиллагааны асуудлаар санал солилцов. Байнгын төлөөлөгч, Элчин сайд В.Чуркин нь НҮБ-ын Аюулгүйн Зөвлөлийн байнгын 5 гишүүн нэг улсын төлөөлөгчийн хувьд НҮБ-ын Аюулгүйн Зөвлөлийн шинэчлэлийн асуудлаарх засгийн газар хоорондын хэлэлцээний төлөв сэдвээр Стратегийн судалгааны төвийн судлаачид, их дээд сургуулийн багш оюутнууд болон ГХЯ-ны ажилтнуудад лекц уншив.

Тэрээр олон улсын энх тайван, аюулгүй байдлыг сахиулах гол үүрэг хүлээдэг НҮБ-ын Аюулгүйн Зөвлөлийн үйл ажиллагаа, тухайлбал, олон улсын энх тайван, аюулгүй байдлыг хангах чиглэлээр НҮБ-ын Аюулгүйн Зөвлөлөөс авч хэрэгжүүлж буй арга хэмжээ болон олон улсын түвшинд яригдаж буй ээдрээтэй, тулгамдсан асуудлыг хэрхэн шийдвэрлэж буй талаар олон жишээ дурдан сонирхолтой яриа өрнүүлэв. Виталий Иванович Чуркин 2006 оны 5 дугаар сараас ОХУ-аас НҮБ-д суугаа Байнгын төлөөлөгчийн албыг хашиж байна.

Тэрээр 1992-1994 онд ОХУ-ын Гадаад хэргийн дэд сайд, 1994-1998 онд Бельгийн Вант Улсад суух элчин, 1998-2003 онд Канад Улсад суух элчин сайд, 2003- 2006 онд Тусгай үүрэг гүйцэтгэгч элчин сайдаар тус тус томилогдон ажиллаж байсан. 1974 онд Москвагийн Олон улсын харилцааны дээд сургуулийг төгссөн. 1981 онд ЗХУ-ын Дипломатын академид түүхийн ухаанаар докторын зэрэг хамгаалжээ. Тэрээр англи, франц, монгол хэлний мэдлэгтэй юм.