Эх болох хүсэл нь биелжээ гэж ойлгож болно. Харин гоол алдсан үед эсрэгээрээ. Сэтгэлээр унана гэсэн үг. Эцэст нь хаана, яаж хямдхан үр хөдүүлж болох талаар судалж эхэлнэ.

Аборт буюу үр хөндөлт гэдэг нь жирэмслэлтийг зориудаар таслахыг хэлнэ. Үүнийг жирэмслэлтийн янз бүрийн хугацаанд (28 долоо хоног хүртэлх) эмнэлэгт хийдэг. Ихэнхдээ хүсээгүй жирэмслэлт, ойрын үед хүүхэд төрүүлэхийг төлөвлөөгүй үед үр хөндөлтийг хийдэг байна. Үүнд олон шалтгаан байж бол­но. Тухайлбал сан­хүүгийн, эсвэл байр орон сууцны бололцоо муу, хүүх­дийн эцэг тодорхойгүй гэх мэт.

Зарим тохиолдолд үр хөндөл­тийг эмнэлгийн шалтгааны улмаас хийдэг. Жи­шээлбэл, жирэмсэн үедээ халдвар авсан, эсвэл үрэвслийн өвчтэй байх, жирэмсний үед хориотой эм уусан, гажигтай хүүхэд төрөх магадлал өндөр байх үед үр хөндүүлнэ.

Үүнээс гадна улс бүр үр хөндөлтийн асуудалд янз бүрээр ханддаг. Үр хөн­дөх хориотой оронд аборт хийлгэвэл эрүүгийн хэрэгт татаг­дах зэрэг үр дагавар­тай. Гэвч тухайн улс, эсвэл нийгмийн давхарга нь абортын талаарх ямар бодлого барим­талж байгаагаас үл хамаараад хувиараа хүсээгүй жирэмслэлтээс ангижрах гэж оролдсоны хэрэггүй, ялангуяа эмчлэх эрх байхгүй сайн дурын хүмүүст хандаж огтхон ч болохгүй.

Үр хөндөлт

Үр хөндүүлэх гэж буй эмэгтэйчүүд аборт хэд хэдэн төрөл байдгийг мэдэх нь зүйтэй. Хамгийн орчин үеийн арга бол эмийн аргаар үр хөндөх бөгөөд энэ нь жирэмсний найман долоо хоног хүртэлх хугацаанд хэрэглэгдэнэ. Түүний гол давуу тал нь мэс заслын ажилбар шаардагддаггүй явдал юм. Мөн таван долоо хоног хүртэлх хугацаатай үед вакум буюу соруулах аргыг хэрэглэж болно. Илүү өргөн хэрэглэгддэг сонго­дог төрөл болох багажаар үр хөндөх арга нь 12 долоо хоног хүртэлх хугацаанд хийгддэг. Энэ нь хүндрэл үүсэх магадлал өндөртэй жинхэнэ мэс ажилбар юм.

Хугацаа хэтэрсэн буюу 12 долоо хоногоос илүү хугацаатай үед үр хөндөл­тийг зөвхөн эмэгтэйн амь насанд аюултай, эсвэл урагт гажиг илэрсэн нөхцөлд л хийдэг. Энэ ажилбарыг хиймэл төрөлт гэж нэрлэдэг. Хиймэл төрөлтийг хоёр аргаар хийдэг.

Ургийн усанд шингэн хийж ургийг үхүүлэн зул­буулах, эсвэл жижиг хэм­жээний кесарво хагалгаа (хэвлийн хана болон умайн ханыг зүсч авах) хийж ургийг авах гэсэн хоёр төрлийн арга байдаг. Ийнхүү үр хөндөх аргыг сонгохдоо жирэмсний хугацаанаас гадна бие махбодын онцлог ба түүнчлэн үр хөндөлтийн төрөл бүрт гардаг янз бүрийн хүндрэлүүдийг зайлшгүй харгалзаж үзэх шаардлагатай. Тиймээс үр хөндүүлэхийн өмнө заавал эмэгтэйчүүдийн эмчээс зөвлөгөө авч доорх шинжилгээнүүдийг хийлгэх хэрэгтэй. Үүнд цусны био­химийн шинжилгээ, БЗХӨ болон ХДХВ-ийн халдвар илрүүлэх шинжилгээ, үтрээний наалдац, цусны бүлэг ба резус фактор тодорхойлох шинжилгээ, бага аарцгийн эрхтнүүдийн хэт авианы шинжилгээ юм. Харин эмч таны эрүүл мэн­дийн онцлогтой хол­боо­тойгоор зарим нэгэн нэмэлт шинжилгээ бичиж өгөхийг үгүйсгэхгүй.

Үр хөндөлтийн дараа

Үр хөндүүлсний дараах хоёр долоо хоногт хүнд юм өргөхгүй, хэт ядрахгүй байх нь зүйтэй. Зөвхөн шүршүүрт усанд орж, гадна бэлэг эрхтнээ буцалсан усаар угааж, дотуур өмдийг ойр ойрхон сольж, бэлгийн харьцаанд орохгүй байх хэрэг­тэй. Түүнээс гадна бүх төрлийн абортын үед хүндрэл гарч болзошгүй байдгийг санах нь чухал. Биеийн байдал муудах, цусархаг ялгадас гарах болон хэвлийн доогуур өвдөлт өгөх зэрэг зовиурууд илэрвэл яаралтай эмэгтэйчүүдийн эмчид үзүүлэх хэрэгтэй. Жирэмслэлтийг зохиомол аргаар таслах буюу аборт, үр хөндөлт нь эмэгтэй хүний нөхөн үржихүйн эрүүл мэндэд тодорхой нөлөөг ямагт үзүүлж байдаг. Тиймээс үр хөндөлт нь цаашид жирэмслэх, жирэмсний явц зэрэгт нөлөөлөх нь гарцаагүй.

Аборт нь тэр бүр эмэгтэй хүний өөрийнх нь сонголт байдаггүй. Дотор эрхтэн, мэдрэлийн системийн хүнд өвчний үед эмнэлгийн заалтын дагуу аборт хийлгэсэн байж болно. Гэсэн хэдий ч шалтгаанаасаа үл хамаараад үр хөндөлт нь таагүй үр дагаварт хүргэж болзошгүй. Эмнэлгийн аборт /сонгодог, зэмсэг ашиглан үр хөндөх/ гэдэг нь умайн ханыг хусахтай зэрэгцэн ургийн өндгийг зайлуулахыг хэлдэг. Эмнэлгийн абортыг 12 хүртэл долоо хоногтойд хийхийг зөвшөөрдөг.

Хийх шаардлагатай бол 6-7 хоногтойд хийхийг хамгийн зохистой гэж үздэг. Үр хөндөлтийг зөвхөн эмч, эмнэлгийн нөхцөлд хийнэ. Умайн хөндий рүү нэвтрэхийн тулд сувгийг нь тусгай тэлэгчээр тэлдэг. Ургийн өндгийг умайн хананаас салгахын тулд кюретк гэж нэрлэгддэг тусгай багажаар хусдаг. Аборт хийлгэсний дараа хэдэн цагийн туршид эмэгтэй хүн эмчийн хяналтад байх ёстой. Хагалгааны дараах явц хэвийн үед эмэгтэйг тэр өдөрт нь гаргадаг. Үүнийг уншаад аборт тун энгийн зүйл юм гэж санагдаж магадгүй ч бодит амьдрал дээр үр хөндөлт нь орчин үеийн эмэгтэйчүүдийн хамгийн нарийн мэс ажилбаруудын нэг юм. Үр хөндөлтийн улмаас үүссэн үрэвсэлт өвчин, умайн үйл ажиллагаат давхарга шавхагдах зэрэг нь үргүйдэлд хүргэж болзошгүй ч жирэмслэсэн бол дараах хүндрэлүүд үүсч болзошгүй.

Зулбах

Үр хөндөлтийн явцад умайн хүзүүний гэмтэл гэсэн хүндрэл үүссэний үр дүнд истмикоцервикал дутагдал буюу умайн хүзүү ба хүзүүвчний дутагдал гэсэн байдал үүсч болно. Ийм дутагдал үүссэн үед умайн хүзүү нь өөрийн тогтоох барих үүргийг гүйцэтгэхгүй болдог. Хэрэв хэвийн үед умайн хүзүү нь жирэмсний бүх л хугацаанд хаалттай байдаг нь ургийн өндгийг умайн хөндийд тогтоох чухал хүчин зүйл болно.

Харин умайн хүзүү ба хүзүүвчний дутагдлын үед энэ функц алдагдана. Умайн хүзүү нь абортын үед мэс заслын багажинд гэмтэж болох булчингийн тогтоц. Ингэж гэмтэх үед язралт үүссэнээр умайн хүзүү нь үйл ажиллагаагаа бүрэн дүүрэн дүүрэн гүйцэтгэж чадахгүй болно. Анхны жирэмслэлтийг үр хөндөлт хийж тасалдуулсан үед гол төлөв ийм хүндрэл үүсдэг. Учир нь анхны жирэмслэлтийн үед умайн хүзүүний суваг нь маш нарийхан, мэс заслын багажаар тэлэгдэхдээ муу байдаг. Умайн хүзүү ба хүзүүвчний дутагдал нь голт төлөв жирэмсний 16-18 дахь долоо хоногт жирэмслэлт тасалдах байдлаар илэрнэ. Ингэхдээ бэлгийн замаас цусархаг ялгадас гарах бөгөөд гэдэсний доод хэсгээр базлалт хэлбэрийн бага зэр­гийг өвдөлт өгдөг ч ихэнхдээ өвдөлт өгдөггүй. Үүний дараагаар ургийн өндөг нь умайгаас гадагшилж зулбана.

Өмнө нь үр хөндүүлж байсны улмаас зулбалт үүсэх өөр нэг шалтгаан нь гормон буюу дааврын зохицуулалтад өөрчлөлт орох явдал юм. Жирэмсний үед ургийн хэвийн өсөлт хөгжилтийг хангахын тулд ирээдүйн эхийн бие мах­бодын бүх систем өөрчлөгддөг. Жирэмслэлтийг зохиомлоор таслах үед өндгөвч, өнчин тархи буюу гипофиз зэрэг дотоод шүүр­лийн эрхтнүүдийн хэвийн ажиллагаа алдагдаж болзошгүй. Ийм алдагдал нь эхний гуч хоногт жирэмснийг хадгалахад шийдвэрлэх үүрэг гүйцэтгэдэг прогестерон буюу шар биетийн дааврыг дутагдлаар илэрнэ.Эмчийн заалтын дагуу шаардлагатай эмийн бэлдмэлийг хэрэглэх замаар энэ хүндрэлийг арилгаж болно.