2011 онд 66 сэтгүүлч ажлаа хийж яваад амиа алджээ
Өнгөрч буй онд дэлхийн өнцөг булан бүрт нийт 66 сэтгүүлч амиа алдсан хэмээн хэвлэлийн эрх чөлөөг хамгаалагч Хил хязгааргүй сэтгүүлчид төрийн бус байгууллага мэдэгдлээ. Ийнхүү 2011 онд өмнөх жилүүдээс олон сэтгүүлч амь үрэгдсэн нь Арабын ертөнцийн хувьсгал хүчээ авсантай шууд холбоотой гэж тус байгууллага үзэж байна. Харьцуулахад 2010 онд дэлхийн өнцөг булан бүрт 57 сэтгүүлч нас барсан юм. Түүнчлэн Мексикийн хар тамхины гэмт хэрэг болон Пакистаны улстөрийн тогтворгүй нөхцөл байдлын улмаас олон сэтгүүлч амиа алджээ.
Хил хязгааргүй сэтгүүлчид төрийн бус байгууллагын мэдээлснээр 2011 онд Пакистанд амь үрэгдсэн 10 сэтгүүлчийн дийлэнх нь аллагын золиос болсон гэнэ. Ер нь Пакистан улс сүүлийн хоёр жил дараалан сурвалжлага хийхэд хамгийн аюултай улсаар шалгарч байна.
Энэ оны эхнээс Арабын ертөнцөд газар авсан Засгийн газрын эсрэг бослого,үймээний үеэр ажил үүргээ гүйцэтгэж явсан 20 сэтгүүлч амиа алджээ. Ийнхүү Арабын улс орнуудад амь үрэгдсэн сэтгүүлчдийн тоо өмнөх оноос даруй хоёр дахин нэмэгдсэн байна. Эргэн сануулахад Арабын хувьсгал 2011 он гарсны дараахан буюу Ерөнхийлөгчөө унагах Египетийн ард түмний бослогоос эхэлсэн. Удалгүй Египетийн хувьсгал ойр орчмын улс орнуудад газар авсан билээ.
Хамгийн гол нь амиа алдсан сэтгүүлчдийн дийлэнх нь Арабын орнуудын Засгийн газрын цэргүүд, цагдаагийнхны суманд өртсөн аж. Энэ нь Арабын ертөнцийн зарим улс орон сэтгүүлчдийн эрх чөлөөнд халдсан үйл ажиллагаа явуулж байсантай холбоотой гэж Хил хязгааргүй сэтгүүлчид байгууллага мэдэгджээ. Мөн Латин Америкийн хамгийн аюултай бүс нутаг болох Мексикт гэмт хэргийн золиос болж, амиа алдсан сэтгүүлчдийн тоо өнгөрсөн оныхоос хоёр дахин өсчээ.
1044 сэтгүүлч баривчлагджээ
Хил хязгааргүй сэтгүүлчид байгууллагын мэдэгдсэнээр 2011 онд дэлхий дахинд нийт 1044 сэтгүүлч баривчлагдсан гэнэ. Энэ нь өнгөрсөн жилээс хоёр дахин өссөн тоо юм. Ийнхүү баривчлагдсан сэтгүүлчдийн тоо огцом өссөн нь мөн л Арабын ертөнцийн хувьсгалтай шууд холбоотой. Түүнчлэн АНУ, Чили, Их Британи, Грек, Беларус, Уганда зэрэг улсад дэгдсэн хөрөнгөтний эсрэг бослогын үеэр ажил үүргээ гүйцэтгэж явсан олон сэтгүүлч баривчлагджээ.
Хэвлэл мэдээллийнхэнд хамгийн ээлгүй орноор Хятад, Иран хоёрыг нэрлэсэн талаар Хил хязгааргүй сэтгүүлчид байгууллага мэдэгдэв. Энэ хоёр улсын тухайд ямар нэг таагүй мэдээлэл нийгэмд тарахад хамгийн түрүүнд л сэтгүүлчдийг буруутгадаг. Үүнтэй холбоотойгоор олон сэтгүүлч өнөөг хүртэл өргөст торны цаана сууж байгаа юм байна.
