танилцуулах зорилгоор нийслэл, дүүрэг, харъяа байгууллагууд нээлттэй хаалганы өдрийг өнөөдөр Сүхбаатарын талбайд зохион байгууллаа.

Манай улсын нийт хүн амын тал хувь нь Улаанбаатар хотод амьдарч, дотоодын нийт бүтээгдэхүүний 48 хувийг үйлдвэрлэж, төсвийн орлогын 34 хувийг бүрдүүлж байна. Сүүлийн жилүүдэд Улаанбаатар хотын бүтээн байгуулалтын ажил өргөжин хөгжиж, улс, хотын төдийгүй хувийн хэвшлийн байгууллагуудын оролцоо идэвхижиж, нийтийн хөгжилд зориулах төсөв хөрөнгийн хэмжээ нэмэгдсээр байгаа. Хотын хөгжил дэвшилд түлхэц өгч буй гол хүч нь нийслэлийн иргэдийн идэвхитэй оролцоо зүтгэл. Улсын нийслэл Улаанбаатар хотод хийгдсэн ажлын үр дүн бүхэн Монгол Улсын Засгийн газрын нэгдмэл үйл ажиллагаатай шууд холбоотой хэмээн өдөрлөгийг нээж хэлсэн үгэндээ Нийслэлийн Засаг даргын нэгдүгээр орлогч Б.Баатарзориг онцолсон. Өдөрлөгт хүрэлцэн ирсэн Ерөнхий сайд С.Батболд Улаанбаатар хотын удирдлагууд хийсэн ажил, хэлэх үгтэйгээр 4 жилийнхээ ажлыг тайлагнаж буйд сэтгэл хангалуун байгаагаа илэрхийлж, сайхан амлаж, хоосон яриад суух биш тодорхой ажлуудыг бодитой хийж, зарим ажлын цаашид хийх чиг төлөвийг гаргаж чадсаныг цохон дурдсан юм.

Улаанбаатар хотод 2008-2011 онд 23 сургууль шинээр баригдан, 26 сургуульд спортын иж бүрэн талбай, орон сууцны дунд 98 байршилд спортын болон чөлөөт цагийн ногоон талбай байгуулж, эрүүл мэнд, спорт, хөдөлмөр эрхлэлт, нийгмийн бүхий л салбарт ахиц дэвшил гарчээ. Мөн 110,4км авто зам, 169,1 метр урт бетон гүүрийг шинээр барьж, 1406,6 метр урт гүүрийг өргөтгөн шинэчилж, явган хүнд зориулсан болон автомашин явах нүхэн гарц барьжээ. Автозамын 46 уулзварт хөдөлгөөн зохицуулах гэрлэн дохио, 26 уулзварт хөдөлгөөнийг хянах телекамер, 52 цэгт хөдөлгөөн мэдрэгч систем бүхий Замын хөдөлгөөний удирдлагын төвийг байгуулсан байна.

Нийтийн тээврийн 400 автобусаар парк шинэчлэлт хийж, монгол инженер техникийн ажилтнуудын хөдөлмөрөөр 32 ширхэг троллейбус угсарч үйлчилгээнд гаргажээ. 28585 айл өрх байнгын эрчим хүчээр хангагдаж, 21500 барилга байгууламж шинээр төвлөрсөн дулааны сүлжээнд холбогджээ. 2008-2011 онд 30955 айлын орон сууцны 461 барилга ашиглалтанд орж, 21489 иргэнд газар өмчлүүлсэн. Гэр хорооллын газраа чөлөөлж өгсөн айл өрхийг түр суурьшуулах 300 айлын орон сууцыг нийслэлийн хөрөнгөөр барьж байгаа зэрэг хийсэн ажлуудаа хотын нэгдүгээр орлогч товчлон дурдлаа.

Их багтаамжийн нийтийн тээврийн төрлийг нэвтрүүлэх зорилгоор метроны шугамыг барьж байгуулах ажлыг эхлүүлэх, хатуу хучилттай автозамын сүлжээний нийт уртыг 1000 км-ээс багагүй болгож, ногоон бүс, шинэ суурьшлын бүс болон гэр хорооллын хатуу хучилтгүй авто замуудыг сайжруулан шинээр барих, 5 цэгт төмөр зам дээгүүр гүүрэн гарц барих, Газар доорхи хот төслийн дагуу хийгдэх ажлыг тодорхойлж, метро, үйлчилгээ, автомашины зогсоол, явган гарцууд, шугам сүлжээний хонгилын систем гэх зэргээр газар доорхи орон зайг үр дүнтэй ашиглах төслүүдийг хэрэгжүүлж эхлэх нөхцөлийг бүрдүүлэх гээд цаашид олон ажлыг хийхээр төлөвлөж буйг тэрбээр хэллээ.

Туул, Сэлбэ, Улиастай, Дунд голуудын урсацыг нэмэгдүүлж, усан толио, эргийн тохижилтыг хийж, аялал жуулчлал, чөлөөт цагийн бүс байгуулах, нэг хүнд ногдох ногоон байгууламжийн хэмжээг нэмэгдүүлэн Ногоон хот болгох, 100-150 ортой 15 цэцэрлэг, 640-960 суудалтай 3-аас доошгүй сургуулийг шинээр барих, цэцэрлэггүй хороодын асуудлыг бүрэн шийдэх, 7 дүүрэгт спортын цогцолбор, 5 дүүрэгт усан бассейн барьж ашиглалтад оруулахаар ажиллаж байна.