Нөхөн сэргээлт хийгээгүйн улмаас 17.9 мянган га талбай өгөршжээ
хэлэлцүүлэг зохион байгууллаа. Одоогийн байдлаар манай улсын нийт нутаг дэвсгэрийн 22.3 сая га буюу 14.5 хувь нь уул уурхайн тусгай зөвшөөрөлт бүсэд оржээ. Хамгийн ноцтой нь 17 мянга 966 га талбайд нөхөн сэргээлт хийгээгүйн улмаас өгөршсөн гэж холбогдох албаныхан мэдээлсэн юм.
Үүнээс гадна уурхайн стандартын бус тээвэрлэлт нь байгаль орчныг доройтуулах гол шалтгаан болж байгаа аж. Тухайлбал, Таван толгойгоос Цагаан хад хүртэлх 235 км замын хоёр талаар нийт 35 мянга 250 га газрын хөрс эвдрэлд орсон байна. Үүнээс гарсан хохирлыг тооцоход нийт 58.1 тэрбум төгрөг болсон. Гэхдээ энэ хохирлыг хэн хариуцах вэ гэдгийг хэлэх нэгэн байсангүй.
Дээр нь Байгаль орчин, ногоон хөгжлийн яамны судалгааны дүгнэлтэд гол, горхи, булаг шанд, нуур тойром ийнхүү ширгэх болсон шалтгаан нь уур амьсгалын өөрчлөлт, аж ахуйн үйл ажиллагааны нөлөөгөөр усны горим, нөөц, чанарт өөрчлөлт орж, усны хомсдол үүссэн гэжээ. Үүнийг нарийвчлан гаргахад 551 гол горхи, 1548 булаг шанд, 417 нуур тойром дахин сэргэхгүйгээр ширгэсэн гэх эмгэнэлт тоо гарсан байна.
Уул уурхайн зохисгүй үйл ажиллагаа байгаль орчинд ийм маягаар нөлөөлж буй бол иргэдийн амьдралд ч хор хохирол учруулж байгаа аж. Зөвхөн Өмнөговь аймгаар жишээ авахад, Гурвантэс сум 2.8 сая га газар нутагтай бөгөөд үүний 40 гаруй хувь буюу 1.1 сая га-д нь уул уурхайн үйл ажиллагаа явуулж байгаа гэнэ.
Мөн судалгаанаас үзэхэд Өмнөговь аймгийн Цогтцэций, Ханбогд, Гурвантэс суманд 2004 оны байдлаар малчдын тоо 3029 байсан бол 2012 онд 1352 болж, даруй 56 хувиар цөөрчээ.
Үлдсэн малчдын тухайд ч бэлчээрийн мал аж ахуйгаа эрхлэх боломж улам бүр хумигдаж байна. Жилдээ дөрвөөс доошгүй удаа отор нүүдэл хийдэг байсан малчид одоо 1-2 удаа нүүснээ олонд тооцож байна.
Өвөг дээдсээсээ өвлөн авсан өвөлжөө, хаваржаа, намаржаагаа өөрсдийн өмч хэмээн үздэг хэдий ч одоогийн эрх зүйн зохицуулалтын хүрээнд өвөлжөөний газраас бусдад нь нутаглах эрхгүй болжээ.
