Үр ашигтай Баялгийн сангийн удирдлага сэдэвт бага хурлаар байгалийн баялаг ихтэй улс орнуудын Баялгийн санг удирдаж ирсэн талаарх туршлагыг хуваалцаж, Монголын шийдвэр гаргагч, бодлого боловсруулагчдад Монгол Улсын хэтийн хөгжилд нийцсэн баялгийн сангийн тогтолцоог бүрдүүлж ажиллахад түлхэц өгөх бодлогын хэлэлцүүлэг өрнөх юм.

Хурлын хүндэт зочдоор баялгийн санг амжилттай зохион байгуулж, удирдаж буй олон улсын төлөөлөгчид уригдсанаас Баялгийн сангийн туршлагаараа дэлхийд тэргүүлдэг Норвеги Улсын Сангийн дэд сайд оролцох юм байна.

Норвеги улс нь улсын төсвөө газрын тосны үнийн хэлбэлзлээс ангид байлгаж тогтворжуулах, одоогийн болон ирээдүй үедээ баялгийг хуваарилахын тулд хуримтлал үүсгэх зорилгоор Засгийн газрын тэтгэврийн санг 1990 онд байгуулсан. Тус сангийн хөрөнгөөр эдийн засагт халалт үүсэхээс сэргийлэхийн тулд гадаад зах зээлд хөрөнгө оруулж, сангаас сангийн хөрөнгийн 4 хувь буюу хөрөнгө оруулалтаас олох бодит өгөөжтэй тэнцүү хэмжээг л зарцуулах эрхтэй байдаг. Норвеги улс нь Дэлхийд баялгийн сангийн туршлагаараа бусад улс орнуудад загвар болсон том хэмжээний сантай улс юм.

Г.Уянга

Оллоо.мн