Цахимаар газар өмчлүүлэх программыг ТЕГ-ын кибер гэмт хэрэгтэй тэмцэх хэлтэст хянуулна
Өнгөрсөн дөрөвдүгээр сарын 1-нээс эхлэн иргэдэд цахимаар газар өмчлүүлнэ гэж байсан ч уг ажил тодорхойгүй хугацаагаар хойшлоод байсан билээ. Тэгвэл энэ асуудлаар өнөөдөр Нийслэлийн өмчийн харилцааны газар болон, Ерөнхий төлөвлөгөөний газраас мэдээлэл хийлээ. Одоогоор цахимаар газар өмчлүүлэх ажлын бэлтгэл ажлыг хангаад дуусаж байгаа аж. Сонгогдсон байршлуудад хэсэгчилсэн төлөвлөгөө хийсэн байна.
Ингээд иргэдэд цахим хэлбэрээр газар өмчлүүлэх хүсэлтийг хүлээж авах эрхзүйн орчин бүрдүүлэхээр журмын төсөл боловсруулсан байна. Ингээд НИТХ-аар боловсруулан батлуулах аж. Ингээд иргэдэд газар өмчлүүлэх ажлыг эхлүүлэх юм байна. Түүнчлэн газар өмчлөх хүсэлтээ цахимаар хүлээн авах тул тус програмын аюулгүй байдлыг хангахын тулд ТЕГ-ын кибер гэмт хэрэгтэй тэмцэх хэлтэст шалгуулах санал тавиад байгаа юм байна. Ингээд программын аюулгүй байдлыг баталгаажуулж дуусаад аль болох хурдан хугацаанд газар өмчлөх хүсэлтийг хүлээн авч эхлэх юм байна.
Нийслэлийн 160 орчим мянган иргэнд долоон дүүргийн 52 байршилд 15 мянган га газрыг өмчлүүлэхээр болоод байгаа. Эдгээр сонгогдсон байршлууд нь нэлээд алслагдсан газарууд байгаа бөгөөд сургууль, цэцэрлэг, зам эрчим хүч гэх мэт дэд бүтцийн асуудлыг цогцоор нь шийднэ хэмээн Нийслэлийн өмчийн харилцааны газрынхан хэллээ. Иргэдэд газар өмчлүүлэх ажил эхлээд 11 жил болж байгаа ч нийслэлчүүдийн ердөө 10 хувь нь газраа өмчилж авсан аж.
