“Google”-ийн жолоочгүй машин хотын хөдөлгөөнд саадгүй оролцов
Техник технологийн салбарт шинийг эрэлхийлэгч, сүүлийн жилүүдэд зах зээлээ хурдтай тэлж буй “Google” корпораци ээлжит шинэ туршилтаа танилцууллаа. Хэдэн жилийн өмнө туршилт нь эхэлж байсан “Жолоочгүй машин” энэ удаа автомат жолоодлогын тусламжтайгаар хотын хөдөлгөөнд ямар ч саадгүй бүрэн явж сурав.
Энэ тухай “Cnet” агентлаг мэдээлсэн бөгөөд урьд нь янз бүрийн технологийн компаниуд жолоочгүй автомашиныг туршиж байсан ч энэ удаагийнх шиг бүрэн төгөлдөр амжилтад хүрч байсангүй. Зарим компаниуд жолоочгүй машиныг тусгай замаар, туршилтын журмаар явуулж байсан юм.
Мөн зам сканнердах төхөөрөмж, урд нь ямар нэгэн саадгүй тохиолдолд л жолоочгүйгээр алсын удирдлагаар автомашиныг явуулсан удаатай билээ.
Тэгвэл “Google” энэ удаагийн оролдлогоор өмнөх бүх туршилтаас илүүтэй шинэ дэвшилтэт алхам хийж чадсан юм.
Японы “Toyota” корпорацийн тусгай захиалгаар “Pruis 20” маркийн автомашиныг туршилтад ашигласан бөгөөд “Google”-ийн инженерүүдийн ур чадварын хүчээр жолоочгүй машин нэг дор гадны 100 гаруй биетийг шууд илрүүлж өөрийгөө удирдах боломжоор хангагджээ.
Үүнд замын тэмдэг, тэмдэглэгээ гэрлэн дохио, хүн, зэрэгцээ, урд, хойд, ард эгнээнд зорчин яваа тээврийн хэрэгсэл тэр бүү хэл замын хажуугаар яваа дугуйтай хүнийг замаа солих бол гарын хөдөлгөөнийг нь мэдрэх нарийвчлалтай технологид суурилсан аж. “Google”-ийн тус бүтээл анхны туршилтдаа 50 км зам туулсан бол өнөөдрийн байдлаар аль хэдийн 1000 гаруй км-ийг жолоочгүй туулж, хотын хөдөлгөөний төвлөрөл ихтэй төв замуудаар саадгүй зорчсон байна.
Автомашины дээд хэсэгт болон гол толь, манангийн гэрэл, их гэрлийн орчим, хаалганы дэргэд, арын ухрах системийн голд болон дугуйны дээд талд хөдөлгөөнд оролцох зориулалтын камерууд суурилагдсан байна.
Эдгээр нь нэгэн зэрэг бичлэг хийж, төв компьютерт мэдээллийг хүргэсэн даруйдаа ямар үйлдэл хийхийг тэндээс зааварчлах юм.
Ингэснээр тал бүрийн камераас ирсэн мэдээллүүдийг автомашины төв процессор ердөө 1.2 секундээс хэтрэхгүй хугацаанд боловсруулж, автомашины инженерийн системтэй хослон ажилладаг гэнэ.
Жолоочгүй автомашины хамгийн том давуу талын нэг бол робот системийн үйлдэл. Аливаа нас биед хүрсэн жолооч ямар нэгэн аюул тулгарах тохиолдолд зогсох, хурдаа сааруулах, эсвэл сандарч мэгдэх гэсэн хариу үйлдэл үзүүлдэг болохыг судлаачид тогтоосон юм.
Тэгвэл “Google”-ийн тооцооны систем өөр рүү нь ойртож эсвэл гэнэт аль нэг талаас гарч ирсэн биетийг илрүүлсэн даруйдаа зогсох үйлдэл рүү автоматаар шилжих аж. Энэ нь болзошгүй аюулыг 99.7 хувиар бууруулж буйг туршилтын үед баталсан байдаг.
“Google” энэ туршилтаа анх 2010 оны аравдугаар сараас эхэлжээ. Тэд өнөөдрийг хүртэл тасралтгүй хөдөлмөрлөсөөр анхны туршилтуудаас өнөөгийн амжилтад хүрсэн гэв.
Өглөөний сонин
С.Амарлин
