“Facebook” Хятадад салбараа нээхээр зэхэж байна
Дэлхийн хамгийн олон хэрэглэгчтэй нийгмийн сүлжээний “Facebook” сайт Хятадад салбараа нэхээр төлөвлөж байгаа тухай “Cnet” сайт мэдээллээ. Тэдний уламжилснаар тус сайтын хувь эзэмшигч компани Хятадад борлуулалтын салбараа нээхээр төлөвлөж байгаа бөгөөд ингэснээр Хятадын компаниуд “Facebook”-т сурталчилгаа байрлуулахад дөхөмтэй болох аж. “Facebook”-ийн хувь нийлүүлэгчдийн нэгдлийн дэд тэргүүн Воган Смит “Reuters” агентлагт өгсөн ярилцлагадаа “Бид Хятадад нэвтрэх боломжуудыг судалж байна. Гэхдээ яг хэзээ салбараа нээх талаар тодорхойгүй байгаа” гэжээ.
Зарим эх сурвалжийн уламжилснаар “Facebook”-ийн борлуулалтын салбар энэ оны сүүлчээр Бээжингийн бизнесийн дүүрэгт нээгдэж магадгүй гэнэ.
Тус сайт өмнө нь Хонконгт борлуулалтын салбараа нээсэн юм. Дашрамд дуулгахад, Хятадад “Facebook” хориотой байдаг.
