Улсын хилээр 10 гаруй төрлийн допинг оруулж ирснийг албаныхан нуун дарагдуулсан уу

Өнгөрсөн пүрэв гарагт Бодибилдинг, фитнесийн хол­бооны тамирчин Д.Бат-Эрдэнэ гэгч Чингис хаан Олон улсын нисэх буудлын Буянт-Ухаа дахь гаалиар 30 гаруй сая төгрөгийн үнэтэй допингийн төрлийн бодис бүхий эм тариа оруулж ирснийг гаа­лийн­хан саа­туулсан бай­­на.

Тэр­бээр эдгээр тарилгыг улсын баяр наа­­дамд зо­риулан бөхчүүд, фит­не­сийн тамирчид болон хур­дан мо­риныхонд зориулан оруулж ирсэн аж.

Гэтэл түүний авч ирсэн энэхүү тариаг нөлөө бүхий эрхмүүд хөөцөлдөн авах гэж гаалийнханд шахалт үзүүлж эхэлжээ. Уг нь Д.Бат-Эрдэнийн энэхүү хууль бус үйлдлийг ГЕГ, МХЕГ, ТЕГ-ынхан мэд­сэн хэмээн зарим эх сур­валж мэдээлж байсан юм.

Д.Бат-Эрдэнэ нь 2012 онд Монголын мистер гэх эрхэм хүндтэй цол хүртэж байсан нэгэн. Тэрбээр боди­­билдин­гийн спортоор 14 жил хичээллэж байгаа аж.

Тэгвэл баттай эх сур­валжийн мэдээлж буйгаар Д.Бат-Эрдэнэ нийт 10 төр­лийн нэр бүхий тариаг Тайланд улсаас оруулж ир­сэн бөгөөд дээрх допингийн тариаг сар болгон Монголд авч ирдэг гэнэ.

Уг допингийн тариа нь хорио­той эм тарианд ордог. Фитнесээр хичээллэдэг за­луу­­чуудад “Хурдан хуга­цаанд булчингийн масс ахиулдаг” гэж сурталчилж бизнес бол­гон зарж байсан гэнэ.

Мөн улсын баяр наа­дам дөхсөн учраас хурдан мо­риныхон маш ихээр хэрэглэж байгаа аж. Түүнчлэн бөхчүүд хүр­тэл энэ­­хүү допингийн төр­лийн тариаг тэр аяараа хавтгайрч хэрэглэдэг байна. Хамгийн гол нь энэхүү тариаг хэрэглэснээр маш олон сөрөг үр дагавар авч ирдэг байна.

Тухайлбал олон улсын стан­дартын нэг болох хо­риглосон жаг­саалтын “S1 Анаболик стероид” нь х­о­риотой бодисын ангилалд хамаардаг байна.

Дээрх бодисыг хэрэг­лэсэн эрэгтэй хүнд батга шавах, хатиг гарах, төмсөг агшиж жижгэрэх, үрийн шингэн багасах, чанаргүй болох, бэлгийн сулрал, үргүйдэл, түрүү булчирхай том­рох, үс эрт халцрах, бөөр, элэгний үйл ажиллагаа алдагдах, зан төлвийн өөрчлөлт гарч, догшин хэрцгий болох, бэл­гийн дурш­лын эмгэг үүсэх шинж тэмдэг илэрдэг аж.

Харин эмэгтэй хүнд батга шавах, биеийн галбир эрэгтэй хүн шиг болох, дууны өнгө бүдүүрэх, нүүр, биеэр үс ургах, сарын тэмдэг өөрчлөгдөх, хэлүү томрох, зан төлөв өөрчлөгдөж дог­шин хэрцгий болох, жи­рэмсэн үед үр хөврөл, ураг гэмтэх, бэлгийн дуршил өөрчлөгдөх шинж илэрдэг монгол за­луусын удмын санд маш муу нөлөө үзүүлдэг хортой та­рианы төрөлд багтдаг аж.

Хамгийн энгийнээр тайл­­­­барлахад энэ бодисыг өвчний улмаас туйлдаж, тураалд орсон хүнд эд эс, эрхтэн, биеийн ерөнхий байдлыг дээр­дүүлэн сэргээх зо­рил­гоор өгдөг. Д.Бат-Эрдэнэ мэтийн нөхдүүд хүний эрүүл мэндээр нь наадаж мөнгө олох нэг хэрэгсэл болгож байхад яагаад холбогдох алба­ныхан яагаад өдий болтол дуугүй байв.

Мөн та­мир­чид яагаад энэ­хүү хортой тариаг авахаар ийнхүү улайран зүт­­­гэх бо­лов гэдэг нь ч асуу­­дал юм. Өөрөөр хэлбэл удахгүй болох Улсын баяр наадмаар нөлөө бүхий эрх­мүүдийн морь уралдаж байгаа. Энэхүү хортой бодис тэд­ний морины хэрэглээ учраас ийнхүү дээр дооргүй хөөцөлдөн авах гэж байгаа хэмээн эх сурвалж мэдээлж байсан.

Ингээд бид эл асуудлын талаар ТЕГ-ын Олон нийттэй харьцах албаны ажилтан Хатан­хандмаа­гаас асуухад “Энэ асуудал манайд огт ирээгүй. Учир нь энэ манай харьяалалд байдаггүй уч­раас мэдэх боломжгүй. Тий­мээс та бүхэн цаг­даагийн бай­гууллагаас асуу­сан нь дээр байх” гэлээ. Албаны хүний хэлж буйгаар эл хортой тариа нь ТЕГ-ын харьяанд байдаггүй учраас мэдэх ямар ч боломжгүй аж.

Уг нь иймэрхүү асууд­лыг хамгийн түрүүнд ТЕГ анхааралдаа авдаг гэж хэн хүнгүй л боддог. Мөн энэхүү асуудлыг хамгийн тү­рүүнд анхааралдаа авах ёстой газрын нэг нь МХЕГ. Гэтэл тэд ч мөн адил Д.Бат-Эрдэнийн оруулж ирсэн эл допингийн тариаг огт мэ­дэх­гүй гэсэн хариулт өгч байсан нь олны анхаарлыг татаад байна. Тус газраас Буян-Ухаа гаалийн Хилийн мэргэжлийн хяналтын бай­цаагч Сосорбарамаас асуухыг зөвлөсөн юм.

Ингээд бид түүний 9910… дугаарын утас руу зал­­гаж болсон үйл явдлыг тодруулах гэсэн боловч дууд­лагыг аваагүй тул ха­риулт авч чадаагүй юм.

Энэ бүхэн баттай эх сур­­валжийн хэлсэнчлэн бү­хий л хол­богдох албаны хүмүүс энэхүү хууль бус үйлдлийг олон нийтэд мэ­­дээ­лэх­гүй­гээр дарахын тулд “Манайд ийм мэдээлэл ирээгүй” гэсэн дөрөвхөн үгийг хэлнэ гэж байсан нь үнэний ортой байсан. Монгол залуусын маань удмын санд муугаар нөлөөлж үр удмыг нь уст­гаж байгаа энэхүү хор­той бодисыг оруулж ирчихээд байхад яагаад өнөөдрийг хүртэл ихэд нууцлаж байна вэ.

Бид энэхүү мэдээллийг эрэн сурвалжилж хүргэх болно.

Үргэлжлэл бий…

Өглөөний сонин

Р.Саруул

0 Сэтгэгдэл
Inline Feedbacks
View all comments
Back to top button