Хаврын тариалалтын ажилд зээл олгоно

Энэ онд улсын хэмжээгээр  300.0 мянган га-д улаанбуудай,  13.9 мянган га-д төмс,  8.3 мянган га-д хүнсний ногоо, 1000 га-д жимс жимсгэнэ, 16.0 мянган га-д тэжээлийн таримал,  33.0 мянган га-д тосны ургамал, нийтдээ 400.8 мянган  га-д тариалалт хийх ажээ.  500.2 мянган тонн үр тариа, үүнээс 465.7 мянган тонн буудай, 167.7 мянган тонн төмс, 104.7 мянган тонн хүнсний ногоо, 40.0 мянган тонн малын тэжээл, 26.4 мянган тонн тосны ургамал, 2.5 мянган тонн жимс, жимсгэнэ хураан авахаар төлөвлөжээ.

Тиймээс үр тариа, тос, тэжээлийн таримлын тариалалтыг  14 аймгийн 1190 аж ахуйн нэгж иргэн,  төмс, хүнсний ногоо, жимс жимсгэний тариалалтыг 370 аж ахуйн нэгж, 35.0 мянган өрхийн хэмжээнд тариалахаар бэлтгэлээ хангаж байгаа юм. 

Тиймээс тариалалтын ажлыг технологийн хугацаанд чанар сайтай гүйцэтгэх боломжийг бүрдүүлэх үүднээс салбарын яамнаас  дутагдах үрийн буудайг 30 хувийн, шатахууныг 50 хувийн, бордоо, ургамал хамгаалалтын бодисыг 30 хувийн урьдчилгаатай тус тус зээлээр олгохоор шийдвэрлэсэн байна.  

Төмсний тариаланд 33,9 мянган тонн үрийн төмсний хэрэгцээ байгаа бөгөөд энэхүү үрийг дотоодоосоо бүрэн хангах аж.  

Түүнчлэн 80 сая төгрөгийн үнэ бүхий  найман нэр төрлийн хүнсний ногооны үрийг нийлүүлж байгаа гэнэ. Мөн жимс, жимсгэнэ тариалах сонирхолтой иргэн, аж ахуйн нэгжид 164.0 мянган ширхэг чацарганы суулгацыг таван жилийн хугацаатай зээлээр олгох ажлыг зохион байгуулжээ.