15 телевиз наадмыг дундын багаар шууд дамжуулна

Телевизүүдийн холбоо, телевизийн удирдлагууд хуралдаад энэ удаагийн үндэсний их баяр наадмыг хамтран шууд дамжуулах шийдвэр гаргажээ. Энэ талаар TV5 телевизийн Э.Дагиймаагаас тодрууллаа.

-Энэ удаагийн үндэсний их баяр наадмыг хамтран шууд дамжуулах шийдвэр гаргасан гэсэн. Энэ талаар тодруулаач?

-Монголын телевизүүдийн хол­боо, телевизийн удирд­ла­гууд хуралдаад энэ удаагийн үндэсний их баяр наадмыг хамтран шууд дамжуулах шийдвэр гаргасан. Улмаар энэ шийдвэрийг нь  Үндэсний их баяр наадмын комисс хурлаараа авч хэлэлцээд, дэмжсэн. Тодруулбал, нэр бүхий 15 телевизээр эрийн гурван наадмын үйл ажиллагааг нэг тайлбар, нэг дүрсээр шууд дамжуулах шууд нэвтрүүлгийн дундын нэг багтай байхаар болсон. Ингэснээр МҮОНТ үндэсний баяр наадмыг дан­гаа­раа шууд дамжуулахаас гад­на Монголын теле­ви­зүүдийн холбооны баг нэгдэж ажиллах юм. 

-Телевизүүд нэгдэж наадмыг сурвалжлах болсон нь ямар учиртай юм бэ?

-Сүүлийн үед телевизүүдийн тоо өсөн нэмэгдэж, үүнтэй холбоотойгоор Төв цэнгэлдэх, Хүй долоон худагт ажиллаж байгаа шууд нэвтрүүлгийн баг олон болсон. Олон камер, сурвалжлагч нар байдгаас наадам үзэх нөхцөл бололцоо муу байдаг гэсэн гомдлыг иргэд олон жил хэлсээр ирсэн. Тиймээс энэ шийдвэрийг гаргахад хүрлээ.

-Яг ямар телевизүүд нэгдэж байгааг тодруулаач. Ерөнхий найруулагчаар нь хэн ажиллах вэ?

-Энэ удаад өргөн нэвтрүүлгийн 15 телевиз буюу ТМ, STAR, ЭХ ОРОН, МОНГОЛ HD, TV9, NTV, ШИНЭ ДЭЛХИЙ, EAGLE, SBN, TV5, MN25, TV8, UBS, C1, БОЛОВСРОЛ теле­визүүд хамтран баг бүр­дүүлж шууд дамжуулах юм. Шууд нэвтрүүлийн ерөнхий найруулагчаар NTV телевизийн ерөнхий найруулагч, “On&of”-ын н.Тулга ажиллах байгаа. Шууд нэвтрүүлгийн тайлбарлагч нар хүртэл сонгогдоод байна.

-Бүх л телевизүүдийн наад­мын нэвтрүүлэг адилхан байх нь. Наадмын талаар мэдээ мэдээллээ хэрхэн бэлдэх вэ?

-Наадмыг сурвалжлах мэдээ­ний багаа телевизүүд тус тусдаа гаргаж, өөрсдийн өнгө аясаа харуулах болно. Өөрөөр хэлбэл, телевизүүдийн сурвалжлах баг хэвийн ажиллана. Гол нь наадмын нээлт, хаалт, морь зэрэг онцлог арга хэмжээнүүд дээр л нэгдсэн баг ажиллана. Үзэгчид бүх телевизээр нэг дүрс харна гэж ойлгож болохгүй. Учир нь шууд нэвтрүүлгийн багийнхан олон талаас нь бичнэ. Тиймээс аль дүрсийг сонгох нь тухайн телевизийн сонголтын асуудал байх болно. Монголын телевизүүдийн холбоо байгуулагдаад есөн жил, Монгол Улсад телевизийн салбар үүсээд 48 жил болсон. Энэ хугацаанд шууд нэвтрүүлгийн баг анх удаа гарч байгаараа онцлог юм. Ер нь тив дэлхийн олимпийн наадмуудыг энэ маягаар шууд дамжуулдаг. Тиймээс бид ч зохион байгуулалтад орж үндэсний их баяр наадмыг маш өндөр технологиор өндөр төвшинд шууд дамжуулах цаг нь болсон.

-Хурдан морь дагахад хэчнээн телевизийн машин явах вэ?

-Хурдан морь дагах асуудал дээр иргэдээс жилээс жилд маш олон гомдол ирдэг. Бүх телевиз цээжний морьд дээр овоороод арын морьдыг хаядаг гэсэн асуудал үүсдэг. Тэгвэл энэ жил уг асуудлыг шийдвэрлэж байгаа. Өөрөөр хэлбэл, уралдаж буй бүх морьдыг явц дунд нь иргэдэд бүрэн харуулах болно.