Төв цэнгэлдэхийн гадна талбайд ардын урлагийн тоглолт болно
Үндэсний их баяр наадмаар Төв цэнгэлдэх хүрээлэнгийн гадна талбайд наадамчин олондоо зориулан “Монголын гайхамшигт урлаг” ардын урлагийн тайлбарт тоглолт, уламжлалт наадгайн тэмцээн уралдаан, үндэсний хувцас загварын шоу тоглолт үнэ төлбөргүй зохион байгуулахаар болжээ.
Үндэсний их баяр наадмын Урлаг соёлын салбар хороо, Нийслэлийн соёл урлагийн газар, Монголын урлагийн залуучуудын холбоо хамтран зохион байгуулж буй тус тоглолт долдугаар сарын 11,12-ны өдрүүдэд Төв цэнгэлдэх хүрээлэнгийн гадна талбайд 11:00-19:00 цагийн хооронд зохион байгуулагдах аж.
Тоглолтод Нийслэлийн харьяа дүүргүүдийн ардын урлагийн авьяастнууд, уламжлалт наадгайн өв тээгчид, судлаачид, “Андра” загварын агентлагийн дизайнер, моделиуд оролцох юм байна. Дашрамд дуулгахад, тус тоглолтын нээлтэд ардын урлагийн “Хөсөгтөн” хамтлаг оролцож уран бүтээлийн дээжсээсээ толилуулах гэнэ.
