Урлаг, спортын шилдгүүд өнөөдөр энгэрээ мялаана

Жил бүр тэмдэглалт баяр ёслолын өмнө төр хишгээ хайрлаж, Монгол Улсын хөгжил цэцэглэлтийн төлөө онцгой гавьяа байгуулсан урлаг, спорт, соёл, шинжлэх ухаан зэрэг салбар салбарын шилдгүүдийг шагнадаг. Тэгвэл өнөө жил ч уламжлал ёсоор өнөөдөр шагналын хур буухаар болжээ.

 Тухайлбал, өнөө жилийн баяр наадмаар гурван генерал төрөх сайхан мэдээ дуулдлаа. Хилийн цэргээс нэг, батлан хамгаалах салбараас хоёр генерал төрж байгаа аж. Мөн “Мөрөөдиийн театр” продакшны жүжигчин, хошин урлагийн тайзнаа 20 гаруй жил болж олон дурээр үзэгчидтэйгээ уулзсан жүжигчин ШАптанцэцэг буюу Ааяа гавьяат жүжигчин цолоор энгэрээ мялаахаар болжээ. Төрсөн өдрийн баяраа ард түмэнтэйгээ тэмдэглэж, 10 жил тасралтгүй бие даасан тоглолт хийж, монгол эр хүн, эх нутаг, монгол аавуудын тухай олон сайхан дуугаар үзэгчидтэйгээ уулзаж ирсэн Л.Болдбаатар МУГЖ цолоор энгэрээ мялаах гэнэ.

Мөн “World master”- ын хошой аварга, самбо, кураш бөхийн дэлхийн аварга С.Мияарагчаа МУГТ цол тэмдгээр энгэрээ мялаах юм байна. Тэдний шагналыг өнөөдөр 11.40 цагаас гардуулахаар болжээ. Түүнчлэн, Монгол Улсын нэрийг дэлхийн тавцанд цууриатуулсан дуурийн урлагаас төрсөн Э.Амартүвшин, Г.Ариунбаатар нарын, “Авьяаслаг ази”-чууд тэмцээнд дэд байр эзэлсэн “Хөсөгтөн” хамтлагт Боловсрол соёл шинжлэх ухааны яамнаас мөнгөн шагнал олгохоор болжээ. Тодруулбал, Л.Гантөмөр сайд өчигдрийн Засгийн газрын хуралдаанаар П.И.Чайковскийн нэрэмжит олон улсын дуурийн дуулаачдын уралдаанаас Гран при шагнал хүртсэн Г.Ариунбаатарыг 80 сая төгрөгөөр шагнах санал оруулж, батлуулжээ.

Мөн Английн BBC агентлагаас зохион байгуулсан “Gardiff singer of the world” уралдаанд Данн Иохаан Сатерландын нэрэмжит  буюу үзэгчдийн нэрэмжит шагнал хүртсэн Э.Амартүвшинг 20 сая төгрөгөөр шагнахаар болсон байна. Харин ‘Хөсөгтөн” хамтлагт 24 сая төгрөг олгох шийдвэр гаргаж шагналыг өнөөдөр гардуулах аж. Л.Гантөмөр сайд мөн ЭАмартүвшин, ГАриунбаатар нарын сонгодог урлагийн шилдэг хоёр дуучинд “Хөдөлмөрийн баатар” цол олгох хүсэлтийг Ерөнхийлөгчид гаргасан билээ. Хэрвээ Ерөнхийлөгч соёрхвол монголчууд өнөөдөр урлагийн салбараас мэндэлсэн ихэр Хөдөлмөрийн баатартай болох нь ээ.