Баяр наадмын мэндчилгээний үг

Есөн эрдэнийн гоёлоор баярын жавхааг нэмж

Есөн хөлт цагаан тугаа хоймор юугаан залж

Есөн цагаан хүслээ цацал болгон өргөж

Есөн есөн билэгтэй Монгол түмэн минь Сайхан наадаарай!

* * * * * * * * *

Сар асгарч хур тэгширсэн

Найр хөгжиж хуур уянгалсан Монгол наадам айсуй.

* * * * * * * * *

Шандаст хурдан морьд төрийн сүлдэнд эргэцэж

Шагайн мэргэ гэрэлтэж дөрвөн бэрх бууна

Есөн цацлын нүдээр ертөнцийн зүг уужирч

Ерөөл магтаал цуурайлж нар ойрхон мандана

Ээтэн хоншоорт гутал эрийн хийморинд өнгө орж

Эгэлгүй хүчтэн бөхчүүдийн ид хаваар гайхуулна

Дорнын хөх огторгуй үүлэн чөлөөгөөр мэлтийж

Долоон бурхнаа нууж монгол наадам эхэлнэ

Та бүхэн сайхан наадаарай

* * * * * * * * *

Эр бяраараа эзэн нь байж, эрмэг хурдаараа эрэлхэг нь байж, эрхий мэргэнээрээ түрүүнд нь байж, дэлгэр зуны налгар талдаа дэнж хотойтол сайхан наадаарай!

* * * * * * * * *

Нарыг бөхтэй, морьтой, суртай нь айлсуулдаг Монгол наадам

Нэрийг улстай, устай, нутагтай нь ижилсүүлдэг Монгол наадам

Хурыг мэхтэй, цэцтэй, хурдтай нь хайрладаг Монгол наадам

Хуурыг хөгтэй, аялгуутай, чавхдастай нь эгшиглүүлдэг Монгол наадам.

* * * * * * * * *

Гийнгоон дуу талд цуурайтаж

Нум сумын исгэрээ салхи зүссэн

Бөхийн дэвээн наадмын талбайг эзэгнэсэн

Дэлхийд ганцхан Монгол наадмаараа

Дэнж хотойтол сайхан наадаарай!

* * * * * * * * *

Домгийн шувуу үргээж монгол наадам эхэллээ

Дорнын хөх тэнгэрийг донсолгож хүлэг морьд эргэлээ

Дэлхий дүүргэж дэвээд хүчит бөхчүүд гарлаа

Дээлтэй наадмын хойморт дархан нум эвшлээ

Их Монгол Улс байгуулагдсаны 805, Ардын хувьсгалын 90 жилийн ойн баярын мэнд дэвшүүлж Эрүүл энх сайн сайхан бүхнийг хүсье.

* * * * * * * * *

Хуртай нартай миний Монголын наадам

Хурдтай цэцтэй Монголын наадам

Есөн хөлт тугаа өөд тэнгэртээ залж

Ерөөл буяны хийморийг сэргээсэн

Санаа цагаан заяа тэгш сайхан наадаарай…

* * * * * * * *

Барс арслангийн хүчтэнүүд нь баруун зүүнээ магнайлан гарч

Хурдан харцагын хүлгүүд нь хурмаст тэнгэртээ тоосоо өргөж

Эрхий мэргэн харваачид нь эвэр нумаа хөвчлөн татсан

Эрийн гурван наадамтай эвийн түшигтэй ард түмэндээ баярын мэнд дэвшүүлье.

* * * * * * * *