Тайландын эзэн хааны цомын тэмцээнд Э.Цэндбаатарын оронд О.Мөнхсайхан оролцоно

Ирэх сарын 2-10-ны өдрүүдэд Тайландын эзэн хааны  цомын тэмцээн  зохион байгуулагдана. Тус тэмцээнд манай улсаас гавьяат дасгалжуулагч Д.Батсүрэн, Ардын багш, гавьяат дасгалжуулагч Д.Банди, Н.Мөнхсайхан нарын удирдлага дор 49 кг-д Г.Ган-Эрдэнэ, 52 кг-д М.Гандулам, 56 кг-д О.Мөнхсайхан, 60 кг-д “Рио-2016” олимпийн наадмын хүрэл медальт, гавьяат тамирчин Д.Отгондалай, 64 кг-д Армийн дэлхийн аварга Б.Чинзориг, 69 кг-д Азийн АШТ-ийн мөнгө, хүрэл медальт Б.Түвшинбаят, 75 кг-д Ж.Отгонжаргал нар  оролцохоор мэдүүлгээ  хүргүүлжээ.

Дашрамд дуулгахад,  тус тэмцээний 56 кг-д  Рио-2016 олимпийн наадмын  тавдугаар байрын шагналт  ОУХМ Э.Цэндбаатар өрсөлдөхөөр мэдүүлгээ өгөөд байсан билээ. Гэвч тэрбээр автын осолд орж, хүнд гэмтэл авсан тул түүний оронд О.Мөнхсайханыг оролцуулахаар шийдвэрлээд байгаа юм.