Ховд Шонхорууд цувралыг тэргүүлж эхэллээ

MNBA Үндэсний лигийн зүүн бүсийн аваргийн төлөөх цувралын гурав дахь тоглолт өчигдөр МҮЭСТО-нд боллоо.

Сүхбаатар аймгийн дасгалжуулагч А.Алтан-Очир техникийн алдааны улмаас энэ тоглолтод оролцоогүй бол түүний оронд туслах дасгалжуулагч С.Баяраа багаа удирдлаа. Тоглолтын эхнээс Ховд Шонхорууд илүү тоглолтыг үзүүлж байсан ч хоёрдугаар үед Сүхбаатар Альянс Тех баг оноог зургаа болгож ойртуулсан юм. Гэхдээ гуравдугаар үе эхлээд Ховд Шонхорууд баг онооны зөрүүг эргүүлэн холдуулж 20 онооны давуу болж итгэл төгс тэргүүлж эхэлсэн.

Шийдвэрлэх үед Шонхорууд баг ээлж дараалсан техникийн алдаа авч хүнд байдалд орсон юм. Гэсэн ч Сүхбаатар аймаг оноог нөхөж чадалгүй явсаар хожигдол хүлээв. Ингэснээр Ховд Шонхрууд цувралыг 2-1-ээр тэргүүлж эхэллээ.

Тоглолтод Ховд Шонхорууд багаас Э.Дөлгөөн 23 оноо, 21 самбар авч дабл дабл хийсэн. Мөн BJ Young 23 оноо, 10 самбар, 8 оновчтой дамжуулалт, Г.Цэнгүүнбаяр 14 оноо, 11 самбар авав. Харин эсрэг багаас Б.Золбаяр 13 оноогоор багаа тэргүүлсэн бол багийн ахлагч Б.Батзолбоо 15 довтолгооноос нэгийг нь ч хийсэнгүй.

Цувралын дараагийн тоглолтод техникийн алдааны улмаас Шонхрууд багийн тоглогч BJ Young, Б.Хангай нар дасгалжуулагч Ш.Азжаргал нар оролцохгүй юм.

Г.Зул