Сэлбэ дэд төвд гэр хорооллыг орон сууцжуулах барилга угсралтын тендерийг нээлээ
Сэлбэ дэд төвийг түшиглэн гэр хорооллыг орон сууцжуулах төслийн эхний ээлжийн 13 га талбайн барилга угсралтын ажлын тендерийг өнөөдөр /2024.09.24/ нээлээ.
Тодруулбал, Сэлбэ дэд төвийг түшиглэн гэр хорооллыг орон сууцжуулах төслийн эхний ээлжийн 13 га талбайн барилга угсралтын ажил гүйцэтгэх тендерийг наймдугаар сарын 26-ны өдөр зарласан. Энэ хүрээнд хуулийн хугацаанд ажлын 20 буюу түүнээс дээш хоногт гадаадын этгээд оролцох боломжтой байдлаар зарлаж, тендерийг нээв.
Нийт төсөвт өртөг 240 тэрбум төгрөг.
Тендерийг нийт 13 га талбайд хоёр багц дээр зохион байгуулсан. Хоёр багц тус бүрт хоёр оролцогч компани тендерийн материал ирүүлсэн байна.
Сэлбэ дэд төвийг түшиглэн гэр хорооллыг орон сууцжуулах төслийн эхний ээлжийн 13 га талбайн тендерийн үр дүнд хоёр талбайд нийт 18 блок орон сууцны барилга баригдана. Тодруулбал, 10 блок есөн давхар орон сууц, 8 блок таван давхар орон сууц барих юм. Түүнчлэн төлөвлөж буй 13 га талбайд 960 хүүхдийн сургууль, 240 хүүхдийн цэцэрлэг, хоёр болон 12 давхар үйлчилгээний барилгуудыг барихаар төлөвлөжээ.
Тендерийг нээх үед НОСК-ийн мэргэжилтэн Б.Батзориг “Тендерийн нэгдүгээр багцад “Бодьпропертийз”, “Хунан индастриал экүйпмэнт инсталэйшн” материал ирүүлсэн байна. Хоёрдугаар багцад “Чайна Констракшн Континэнт энд Өүшн Монголиа”, “Хунан индастриал экүйпмэнт инсталэйшн” ХХК материал ирүүлжээ.
Дээрх компани тус бүр хуулийн дагуу тендерийн баталгааг байршуулсан байна. Цаашид Үнэлгээний хороо холбогдох үнэлгээг гүйцэтгэнэ. Ажлын 15 хоногт тендерт оролцогч нарт мэдэгдэл хүргэнэ. Захиалагч нарт шийдвэр, зөвлөмжийг хүргүүлнэ. Тендер нээснээс хойш ажлын 30 хоногт шалгарсан компанитай гэрээ байгуулна.
Гэрээ байгуулж дууссаны дараа барилга угсралтын ажил эхэлнэ. Төрийн худалдан авах ажиллагааны https://www.tender.gov.mn/mn/index/ сайтаас тендерийн талаарх мэдээллийг авах боломжтой. Сэлбэ дэд төвийг түшиглэн гэр хорооллыг орон сууцжуулах төслийн эхний ээлжийн 13 га талбайн барилга угсралтын ажлын тендерийг шалгаруулсны дараа гадна инженерийн шугам сүлжээ, ногоон байгууламжийн ажилд тусдаа тендер шалгаруулна” гэсэн мэдээллийг өглөө.
Эх сурвалж: НЗДТГ, ХМОНХХ