Энэ онд дүүжин замын тээврийн 18 тулгуур баганыг суурилуулжээ
Нийслэл Улаанбаатар хотын авто замын түгжрэлийг бууруулах зорилгоор Бүгд Найрамдах Франц Улс, Монгол Улсын Засгийн газрын хооронд байгуулсан санхүүгийн хэлэлцээрийн хүрээнд нийтийн тээврийн шинэ, байгальд ээлтэй шийдэл болох дүүжин замын тээвэр төслийг хэрэгжүүлж байна. Төслийг Францын “Пома групп” хариуцан гүйцэтгэж дотоодын “Моннис инженеринг” ХХК, “Цагаан уран хийц” ХХК туслан гүйцэтгэгчээр ажиллаж байна. Төсөлд шаардлагатай бүх бараа материалыг Франц улсаас импортолж байгаа бөгөөд 150 чингэлэг ачаанаас 114 чингэлэг ачаа төслийн талбайд бууж, барилга угсралтын ажилд ашиглаж байгаа аж. Яармаг, Арцат-Өнөр хороолол чиглэлийн дүүжин замын тээвэр нь нийт 4.2 км урттай, хоёр зогсоолтой, 6.45-42 метрийн өндөртэй, 19 тулгуур баганатай юм.
Тус бүтээн байгуулалтын бэлтгэл ажлыг бүрэн хангаж, барилга угсралтын ажлыг 2025 оны гуравдугаар сарын 10-ны өдөр эхлүүлж байсан. Өнөөдрийн байдлаар төслийн нийт ажил 54 хувьтай үргэлжилж байгаа аж. Дүүжин замын тээврийн 19 тулгуур багана суурилуулахаас 18 тулгуур баганыг суурилуулж, хоёр буудлын барилгын ажлыг гүйцэтгэж байна. Мөн 98 ширхэг кабины гараашийн барилга угсралтын ажлыг эхлүүлжээ. Энэ өвөл дүүжин замын тээврийн ажил зогсолтгүй үргэлжилэх юм. 2025 оны долоодугаар сарын 8-нд Дүүжин замын тээврийн үйл ажиллагааг хариуцах байгууллага “Улаанбаатар кабель кар” ОНӨТҮГ-ыг байгуулж, зорчигч тээврийн үйл ажиллагааны бэлтгэл ажлыг хангасан байна. Уг төслийн хоёрдугаар шугамыг “Үндэсний цэцэрлэгт хүрээлэн-Үндэсний соёл амралтын хүрээлэн” чиглэлд 2.7 км урттай, гурван зогсоолтойгоор төлөвлөж байгаа аж.